काठमाडौं (हाम्रो खेलकुद) – राष्ट्रिय फुटबल टोली विश्व कप छनोटअन्तर्गत पहिलो चरणको दोस्रो लेगका लागि आज (शुक्रबार) लाओस प्रस्थान गर्दैछ ।

तर, पूर्व निर्धारित समय भन्दा ढिला दिउँसो ३ बजे टोली लाओसका लागि उड्न अखिल नेपाल फुटबल संघ (एन्फा) ले जनाएको छ । पूर्व निर्धारित समय अनुसार दिउँसो १२ः३० बजे फ्लाइट टाइम थियो । नेपाल र लाओस फुटबल टोली एउटै उडानबाट जाँदैछन् ।

नेपाल र लाओसबीच बिहीबार दशरथ रंगशालामा भएको पहिलो लेग १–१ को बराबरीमा टुंगिएको थियो । दोस्रो हाफमा अन्जन विष्टले गोल गरेपछि नेपाल हारबाट जोगिएको थियो । ४८ औं मिनेटमा एरिक विष्टको कर्नरमा अन्जनले सिक्स यार्ड बक्सको एजबाट हेडमार्फत गोल गरेका थिए । त्यसअघि खेलको ३३ औं मिनेटमा लाओसका कप्तान बौनफाचन बौनकोङले लाओसलाई अग्रता दिलाएका थिए ।

अन्जनको त्यो १३ औं अन्तर्राष्ट्रिय गोल थियो । त्योसँगै उनले राष्ट्रिय पुरुष फुटबल टोलीबाट सर्वाधिक गोलको कीर्तिमानमा बराबरी गरेका छन् । उनले हरि खड्का र निराजन रायमाझीको सर्वाधिक गोलको कीर्तिमानीसँग बराबरी गरेका हुन् । अन्जनले आफ्नो ६० औं खेलमा कीर्तिमानी बराबरी गरेका हुन् । सन् २०१४ मा फिलिपिन्सविरुद्ध खेल्दै अन्जनले राष्ट्रिय डेब्यू गरेका थिए ।

पहिलो चरणको विश्वकप छनोट दुई लेगको फर्म्याटमा खेलाइएको छ । एसियाली टोलीहरु मध्ये वरियतामा सबैभन्दा तल रहने २० टोली पहिलो चरण खेल्दै छन् । नेपाल र लाओस बीचको दोस्रो लेग असोज ३० गते लाओसमा हुने छ । दुई खेलमा अघि रहने टोली छनोटको दोस्रो चरणमा प्रवेश गर्नेछ ।