काठमाडौं (हाम्रो खलकुद) – विश्व कप छनोटमा अवे गोलको फाइदा हुने छैन । दशरथ रंगशालामा फिफा विश्वकप २०२६ छनोटको पहिलो चरण अन्तर्गत बिहीबार पहिलो लेगमा नेपाल र पाहुना टोली लाओसले १–१ को बराबरी खेलेका थिए ।

पछि परेको अवस्थामा अन्जन विष्टले दोस्रो हाफको सुरुवाती गोल गर्दै खेललाई बराबरी गरेका थिए । खेल १–१ को बराबरीमा लाओस एक ‘अवे गोल’ गर्न सफल भयो । सामान्यत दुई लेग ढाँचामा खेलाईने खेलहरुमा अवे गोल निकै महत्वपूर्ण मानिने गर्दछ ।

दुई लेगमा बराबरी भएको खण्डमा अवे गोलको नियम अनुसार जुन टोलीले विपक्षीको मैदानमा सर्वाधिक गोल गरेको हुन्छ, त्यही टोलीले जित हासिल गर्ने पद्धति रहन्छ । अवे गोल नियम रहेको खण्डमा लाओसमा हुने खेल गोलरहित बराबरीमा सकिएमा लाओस विजेता भई अगाडि बढ्ने थियो ।

तर फिफाले यस पटकको विश्व कपका लागि छनोटमा यो नियम हटाएको छ । त्यसैले अर्को खेल गोलरहित सकिएपनि नेपाल बाहिरिने छैन । दोस्रो खेल जुनसुकै स्कोरलाइन भएर बराबरी भएपनि खेलमा ३० मिनेटको थप समय खेलाईने छ । थप समयमा पनि बराबरी भएमा खेलको निर्णय पेनाल्टी सुटआउटबाट हुनेछ ।

फिफाले जारी गरेको प्रतियोगिता नियमावलीको च्याप्टर ३ को ११ को ९ मा भनिएको छ ‘यदि दुबै खेलमा एउटा टोलीले अर्को टोलीले भन्दा बढी गोल नगरी समाप्त भएमा, दोस्रो लेगको अन्त्यमा १५ मिनेटको दुई हाफ थप समय खेलाइनेछ । त्यसमा पनि नतिजा नआए पेनाल्टी सुटआउट हुनेछ ।’

नेपालले अघिल्लो संस्करणको विश्वकप छनोटमा भने पहिलो चरण खेल्नु परेको थिएन । नेपाल सिधै दोस्रो चरणमा प्रवेश गरेको थियो । यसपटक भने एसियाली टोलीहरू मध्ये वरियताक्रमको अन्तिम २० मा परेको कारण नेपालले पहिलो चरण खेल्दै छ । पहिलो चरणको दोस्रो लेग असोज ३० गते लाओसमा हुनेछ । सो खेलका लागि नेपाली टोली आज त्यसतर्फ प्रस्थान गर्नेछ ।