काठमाडौं (हाम्रो खेलकुद) –नेपाली राष्ट्रिय फुटबल टोलीका कप्तान किरण चेम्जोङले लाओस विरुद्धको पहिलो खेलमा नेपालले धेरै स साना गल्ती गरेको बताएका छन् । फिफा विश्वकप छनोटको पहिलो चरणको दोस्रो लेगको अघिल्लो दिन सोमबार पत्रकार सम्मेलनमा उनले नेपालले मंगलबार हुने खेल जित हासिल गर्ने लक्ष्य राखेको बताएका छन् ।

‘पछिल्लो खेल निकै निराशाजनक रह्यो। हामीले पहिलो हाफमा धेरै स साना गल्ती गर्यौं, हामीले त्यसमा काम गरेका छौं’, किरणले भने,’ हामीले राम्रो तयारी गरेका छौं र अगाडि बढ्नको लागि जित हासिल गर्ने लक्ष्य राखेका छौं।’

मंगलबारको खेल नेपालका लागि निकै महत्वपुर्ण खेल हो । विश्वकप छनोट चार वर्षमा एक पटक खेलिने गर्छ । छनोटमा जति अगाडि बढ्न सक्यो, त्यति नै राष्ट्रिय फुटबलमा सुधारको सम्भवना रहन्छ । नेपालले पछिल्लो पटक विश्व कप छनोटको तेस्रो चरणसम्म खेलेको थियो । अस्ट्रेलिया, जोर्डन जस्तै बलियो प्रतिद्वन्दी हरु संग प्रतिस्पर्धा गरेको थियो । मंगलबार जित्न नसकेमा नेपाली फुटबल टोलीले बलियो प्रतिद्वन्दी संग प्रतिस्पर्धा गर्न चार वर्ष कुर्नु पर्ने हुन्छ।

कप्तान किरणले दशैंको मौकामा नेपाली समर्थकहरुलाई सकारात्मक नतिजा दिन चाहेको बताएका छन् । ‘यो निकै महत्वपूर्ण खेल हो र हामी सुन्दर फुटबल खेल्न चाहन्छौं’, किरणले थपे, ‘टोलीको मुड राम्रो छ र केटाहरू भोली राम्रो गर्न उत्प्रेरित छन्। हामी दशैं मनाउदै गरेका नेपालमा रहेका समर्थकहरुलाई राम्रो नतिजा दिन चाहन्छौ।’

नेपाल र लाओसबीचको खेल साँझ ५ः४५ बजे सुरु हुने छ । खेलको ९० मिनेट सम्ममा कुनै टोलि विजयी भए स्वतः अगाडि बढ्ने छ । तर ९० मिनेट सम्म पनि नतिजा आउन नसके खेल ३० मिनेटको थप समयमा जाने छ । त्यसले पनि खेलको निर्णय हुन नसके खेलको नतिजा पेनाल्टी सुटआउटबाट निस्कनेछ ।