एजेन्सी – उरुग्वेले २२ वर्षपछि पाँच पल्टको विश्व च्याम्पियन ब्राजिललाई पराजित गरेको छ । फिफा विश्वकप २०२६ अन्तरगत दक्षिण अमेरिकी छनोटमा ब्राजिललाई २–० ले पराजित गर्दै उरुग्वेले २२ वर्षपछि जित निकालेको हो ।

घरेलु टोली उरुग्वेको जितमा डार्विन न्युनेज र निकोलस डि ला क्रुजले गोल गरे । पहिलो र दोस्रो हाफमा उरुग्वेले समान एक गोल गर्दै जित पक्का गर्यो ।

मोन्टेभिडियोमा बुधबार बिहान भएको खेलमा ब्राजिलले घरेलु टोलीलाई दवावमा राखेपनि गोल खान पुग्यो । ४२औं मिनेटमा न्युनेजले गोल गर्दै उरुग्वेलाई १–० को अग्रता दिलाए । उनले म्याक्सिमिलियानो एराउजोको पासमा गोल गर्न सफल भएका थिए ।

पहिलो हाफकै अन्त्यतिर स्टार फरवार्ड नेयमार चोटका कारण बाहिरिनु परेपछि ब्राजिल थप समस्यामा पर्यो । उनलाई स्टेचरबाटै मैदानबाट बाहिर लैजानुपरेको थियो । ७७औं मिनेटमा निकोलसले गोल गर्दै उरुग्वेले ब्राजिललाई २–० को हार चखाए । निकोलसले पहिलो गोल गरेका न्युनेजको पासमा गोल गर्न सफल भएका थिए ।

यसअघि उरुग्वेले सन् २००१ जुलाईमा भएको दक्षिण अमेरिकी विश्वकप छनोटमै ब्राजिललाई १–० ले पराजित गरेको थियो । त्यसयता उरुग्वेले १२ खेलमा जित निकाल्न सकेको थिएन । जसमा ३ बराबरी र ९ हारको नतिजा थियो ।

विश्वकप छनोटमा ब्राजिलले सन् २०१५ पछि पहिलो हार बेहोरेको हो । यस्तै उरुग्वेसँगको हारसँगै ब्राजिलले विश्वकप छनोटमा पहिलोपटक लगातार दुई खेलमा अंक गुमाएको छ ।

यस हारसँगै ब्राजिल ४ खेलबाट ७ अंक जोडेर तेस्रो स्थानमा झरेको छ । ब्राजिललाई हराएको उरुग्वेको समान ४ खेलबाटै ७ अंक रहेपनि हेड टु हेडमा दोस्रो स्थानमा उक्लिएको छ ।