एजेन्सी – लामो समय पछि सुरुवाती ११ मा रहेर खेलेका लियोनेल मेस्सीको २ गोलको मद्दतले अर्जेन्टिनाले फिफा विश्वकप दक्षिण अमेरिकी छनोट अन्तर्गतको खेलमा पेरुलाई २–० पराजित गरेको छ ।

पेरुको राजधानी लिमा स्थित राष्ट्रिय रंगशालामा बुधबार भएको खेलमा जित निकाल्दै अर्जेन्टिनाले १३ खेलमा अपराजित यात्रा कायम गरेको हो । ३२औं मिनेटमा मेस्सीले खेलमा पहिलो गोल गरे । निकोलस गोन्जालेजको बक्सको बायाँबाट आएको पासलाई बक्सको छेउबाट प्रहार गर्दै अग्रता दिलाएका थिए ।

४२औं मिनेटमा एन्जो फर्नान्डेजको पासमा जुलियन अल्भारेजले बललाई छोडिदिएपछि मेस्सीको खुट्टामा बल आइपुगेको थियो। उनले बल नियन्त्रण नगरी पहिलो पटक मै प्रहार गर्दा बलले जाली चुमेको थियो । ५७औं मिनेटमा मेस्सीले बललाई पुनः जालीमा हालेको थिए। तर गोललाई रेफ्रीले भिडियो असिस्टेन्ट रेफ्रीको सहायताले गोल दिएनन् ।

छनोटका खेलहरुमा आज बिहान भेनेजुएलाले चिलीलाई ३–० ले हराउँदा पाराग्वेले बोलिभियालाई १–० ले हराएको हो। यस्तै इक्वेडर र कोलम्बियाले गोलरहित बराबरी खेले । उता उरुग्वेले भने ब्राजिल माथि २–० को जित निकालेको छ। ब्राजिलको यो उरुग्वे विरुद्ध २२ वर्ष पछिको जित समेत हो ।

जितपछि अर्जेन्टिना कन्मेबोल छनोटको शीर्ष स्थानमा छ। अर्जेन्टिनाले छनोटको चार खेल नै जित्दै १२ अंक सहित शीर्ष स्थानमा छ। दोस्रो स्थानमा रहेको उरुग्वेको सात अंक छ । तेस्रो र चाथो स्थानमा रहेका ब्राजिल र भेनेजुएलाको पनि ७/७ अंक रहेको छ।