एजेन्सी – मैत्रीपूर्ण खेलमा फ्रान्सले जित दर्ता गर्दा जर्मनी भने बराबरीमा रोकिएको छ।

फ्रान्सले गएराति स्कटल्याण्डलाई ४-१ ले हराएको हो। खेलमा अग्रता भने स्कटल्याण्डले लिएको थियो। खेलको ११औं मिनेटमा बिल्ली गिलमोरले सुरुवाती गोल गरेका थिए।

तर त्यसपछि खेलमा फ्रान्स हाबी भयो। पहिलो २ गोल डिफेन्डर बेन्जामिन पाभार्डले गरेका थिए।१६औं मिनेटमा एनटोवान ग्रिजम्यान को क्रसमा हेडर गोल गर्दै खेल बराबरीमा ल्याएका थिए।

२५औं मिनेटमा किलियन एमबाप्पेको पासमा व्यक्तिगत दोस्रो गोल गर्दै पाभार्डले फ्रान्सलाई अग्रता दिलाए।

तेस्रो गोल एमवाप्पेले पेनाल्टी मार्फत ४१औं मिनेटमा गरे। ओलिभिएर जिरुडलाई विपक्षी खेलाडी बक्समा लडाएपछि फ्रान्सले पेनाल्टी पाएको थियो।

६८औं मिनेटमा किंग्सली कोमनले चौथो गोल गरे। ग्रिजम्यानको प्रहार पोस्टमा लागेर फर्किएपछि उनको उनले रिबाउन्डमा गोल गरेका थिए।

यस्तै मेक्सिकोमा भएको खेलमा घरेलु टोलीसँग जर्मनीले २-२ को बराबरी खेलेको हो।

एन्टोनी रुडिगरले २५औं मिनेटमा गोल गर्दै अग्रता दिलाएका थिए। तर त्यसको १२ मिनेट पछि मेक्सिकोका एरिएल अनटुनाले गोल गर्दै खेल बराबरीमा ल्याए।

त्यस्तै दोस्रो हाफको सुरुवातमा नै एरिक सान्चेजले गोल गर्दै मेक्सिकोलाई अग्रता दिलाएका थिए। तर त्यसको चार मिनेट पछि नै निकोलास फुलक्रुगले गोल गर्दै जर्मनीलाई खेलमा फर्काए। त्यसपछि खेलमा गोल हुन नसक्दा खेल बराबरीमा सकिएको हो।

जर्मनी अर्को वर्ष हुने युरोपेली च्याम्पियनसिप (युरो कप) को आयोजक हो। त्यसका कारण जर्मनीले छनोटका खेल खेलिरहेको छैन।