एजेन्सी – युरोपेली च्याम्पियन्स लिगको साविक विजेता म्यानचेस्टर सिटीले समूह चरणमा लगातार तेस्रो जित दर्ता गरेको छ ।

समूह जि मा लगातार तेस्रो जित निकाल्ने क्रममा सिटीले योङ्ग ब्वाइजलाई ३-१ ले पराजित गरेको हो । सिटीको जितमा एर्लिंग हालान्डले दुई तथा म्यानुअल आकान्जीले एक गोल गरे ।

सिटीले सुरुवाती अग्रता दोस्रो हाफको सुरुवाती समयमा लिएको थियो । रुबेन डियासको हेडर पोस्टमा लागेर फर्किएपछि आकान्जीले बललाई जालिको दिशा देखाउँदै खेलमा सिटीलाई अग्रता दिलाएका थिए ।

त्यसको चार मिनेट पछि योङ्ग ब्वाइजले खेलमा बराबरी गोल गर्यो । मेससाक एलियाले सुन्दर फिनिश गर्दै खेलमा बराबरी गरेका थिए । त्यसपछि सिटीले दुई गोल थप्दै खेलमा तीन अंक हासिल गर्यो ।

६७औं मिनेटमा हालान्डले पेनाल्टी मार्फत खेलमा सिटीलाई पुनः अग्रता दिलाए । रोड्री बक्समा लडेपछि पाएको पेनाल्टीमा हालान्डले कुनै गल्ती गरेनन् । ८६औं मिनेटमा हालान्डले अर्को गोल गर्दै जित सुनिश्चित गरे । उनले रोड्रीकै पासमा गोल गर्दै व्यक्तिगत दोस्रो गोल गरेका थिए ।

यस्तै सोही समूहमा आरबी लाइपजिगले रेडस्टार बेलग्रेडलाई ३-१ ले हराउदै तीन अंक बटुलेको छ ।

समूह जि मा शीर्ष स्थानमा रहेको सिटीको ९ अंक रहँदा ६ अंक सहित लाइपजिग दोस्रो स्थानमा छ । बेलग्रेड र योङ्ग ब्वाइज समान १-१ अंक सहित क्रमसः दोस्रो र तेस्रो छन् ।