एजेन्सी – जर्मन बुन्डेसलिगा अन्तर्गत शनिबार भएको खेलमा च्याम्पियन बायर्न म्युनिखले डार्मस्टाटलाई फराकिलो अन्तरले पराजित गरेको छ ।

बायर्नले निकै रोमान्चक खेलमा ८-० को फराकिलो जित निकालेको हो । बायर्नको जितमा ह्यारी केनले ह्याट्रिक पूरा गर्दै लिगमा १२ गोल पुर्याए । लेरोय साने र जमाल मुसियालाले २-२ गोल गर्दा थोमस मुलरले पनि १ गोल थपे ।

पहिलो हाफ ३ खेलाडीले रातो कार्ड पाउँदा गोलरहित बराबरीमा सकिएको थियो । तर दोस्रो हाफमा १० खेलाडीमा सिमित बायर्नले ९ खेलाडीमा सिमित डार्मस्टाटविरुद्ध ८ गोल गर्यो ।

बायर्नका जोशुवा किम्मिचले खेलको चौथो मिनेटमा नै रातो कार्ड पाएका थिए । उनले पेनाल्टी क्षेत्रको ठिक बाहिर विपक्षी खेलाडीलाई लडाएपछि रेफ्रीले रातो कार्ड देखाएका थिए । त्यसपछि २१ औं मिनेटमा पाहुना टोलीका क्लाउस जासुलाले पनि उस्तै प्रकृतिको फलमा रातो कार्ड पाए ।

४१ औं मिनेटमा डार्मस्टाटकै माटे मग्लिकाले केनलाई पेनाल्टी क्षेत्रबाहिर लडाएपछि रेफ्रीले रातो कार्ड देखाए । त्यसपछि खेलको बाँकी समय बायर्न १० र डार्मस्टाट ९ खेलाडीमा सिमित रहेका थिए ।

दोस्रो हाफमा भने बायर्नले लगातार गोल गर्न सफल रह्यो । ५१ औं मिनेटमा नुसेर माजरोइको क्रसमा केनले हेडरमार्फत गोल गर्दै सुरुवाती अग्रता दिलाए । त्यसपछि ५६ औं मिनेटमा लेरोय सानेले गोल गर्दा जमाल मुसियालाले ६० औं मिनेटमा छोटो फ्रिकिकलाई गोलमा परिणत गरे ।

६४ औं मिनेटमा सानेले व्यक्तिगत दोस्रो गोल गरे । ६९ औं मिनेटमा केनले आफ्नो हाफबाट गोल गर्दै स्कोर ५-० बनाए । त्यसपछि मुलरले ७१ औं मिनेट, मुसियालाले ७६ औं मिनेट र केनले ८८ औं मिनेटमा गोल थपे ।

बायर्नको ९ खेलमा २३ अंक पुगेको छ । अपराजित बायर्नलाई लेभरकुसनले ८ खेलमा २२ अंक जोड्दै पछ्याइरहेको छ ।