काठमाडौं (हाम्रो खेलकुद)- नेपाल सुपर लिगको नयाँ टोली स्पोर्टिङ्ग इलाम डि मेचीले ट्यापआउट फिटनेससँग सम्झौता गरेको छ।

सम्झौता अनुसार ट्यापआउट फिटनेस इलामको फिटनेस पार्टनर रहने इलामले प्रेस विज्ञप्ति मार्फत जनाएको छ।

स्पोर्टिङ इलाम एफसीका प्रमुख कार्यकारी अधिकृत पियुष बहादुर न्यौपाने, प्रशिक्षक मेघराज केसी र ट्यापआउट फिटनेसका निर्देशक यलम्बर राई, ट्यापआउट फिटनेसका संस्थापक महेन्द्र घलेको सम्झौता पत्रमा हस्ताक्षर कार्यक्रममा सहभागिता थियो।

ट्यापआउट फिटनेसले यस क्लबका खेलाडीहरुलाई स्ट्रेन्थ एण्ड कन्डिसनिङ, रिकभरी तथा जिमको सुविधा प्रदान गर्नेछ । सो सुविधामा ट्यापआउट फिटनेसले पूर्ण प्रायोजन गर्ने छ ।

‘सम्भवत नेपालमा पहिलोपटक जिमसँगै स्ट्रेन्थ एण्ड कन्डिसनिङको काम गर्ने हामी पहिलो हौं। हाम्रो मुख्य उद्देश्य भनेको नै खेलाडीको स्तर बृद्धि गर्ने हो । खेलाडीलाई पूर्ण रुपमा फिट बनाई उसले मैदानमा आफ्नो सत प्रतिशत देओस् भन्ने लक्ष्यसहित हामी काम गर्दै आएका छौ ’ सम्झौता पछि ट्यापआउट फिटनेसका संस्थापक घलेले भने ।

‘स्ट्रेन्थ एण्ड कन्डिसनिङ खेलाडीलाई एकदम आवश्यक पर्छ र यसको महत्व सबै खेलाडीहरूले बुझ्नुपर्छ । स्पोर्टिङ इलाम एफसीमार्फत फुटबलमा पनि जोडिन पाउँदा हामी खुसी र उत्साहित छौं । खेलाडीहरूले अब हुन गइरहेको एनएसएलमा उत्कृष्ट प्रदर्शन गर्न हामी हाम्रो तर्फबाट सक्दो मदत गर्ने छौं ’ उनले थपे ।

इलामले गोलकिपर विकेश कुथुलाई मार्की खेलाडीको रूपमा अनुबन्ध गरेको छ। दोस्रो संस्करणको पहिलो खेलमा काठमाडौं विरुद्ध खेल्दै इलामले आफ्नो यात्राको सुरुवात गर्ने छ। एनएसएल मंसिर ८ गते सुरु हुनेछ।