काठमाडौं (हाम्रो खेलकुद)- अष्ट्रेलियामा रहेका नेपाली राष्ट्रिय फुटबल टोलीका मिडफिल्डर तेज तामाङ नेपाल सुपर लिग (एनएसएल) खेल्न नेपाल आउने पक्का भएको छ ।

वीरगन्ज युनाइटेडले एनएसएलको दोस्रो संस्करणका लागि तेजलाई आफ्नो आईकोनिक खेलाडीका रुपमा सार्वजनिक गरेको छ ।

तेजले भर्खरै अष्ट्रेलियाको भिक्टोरिया स्टेट लिगमा यति एफसीबाट खेलेका थिए। यसअघि दिनेश राजवंशी पोखरा थन्डर्सका आइकोनिक खेलाडीको रूपमा सार्वजनिक भइसकेका छन्।

अघिल्लो सिजन ए डिभिजन लिगमा चर्च ब्वाइज युनाइटेडले अनुबन्ध गरेपछि तेज र दिनेश जनवरीमा नेपाल छोडेर अस्ट्रेलिया गएका थिए । उनीहरूले लिग सुरु हुनुअघि नै नेपाल छाडेका थिए ।

अष्ट्रेलिया जानु अघि तेज नेपाली राष्ट्रिय टोलीको नियमित सदस्य थिए । उनले नेपालको तर्फबाट २३ खेल खेलिसकेका छन् जसमा २० खेलमा सुरुवाती रोजाईमा रहेरै खेलेका थिए ।

उनले २०७८ को ए डिभिजन लिग सिजनमा नेपाल पुलिस क्लबको प्रतिनिधित्व गरेका थिए। उनले त्यस लिग सिजनको १३ मध्य १२ खेल खेलेका थिए। एनएसएलको पहिलो संस्करण काठमाडौं रेजर्स  जित्दा तेज टोलीको सदस्य थिए ।

वीरगन्जले दीप कार्कीलाई मार्की साइनिङको रूपमा भित्र्याएको छ । दोस्रो संस्करण मंसिर ८ गते देखि काठमाडौंमा सुरु हुँदैछ।