एजेन्सी – खेलको अन्तिम समयमा गोल गर्दै म्यानचेस्टर युनाईटेडले इंग्लिस प्रिमियर लिगमा शनिबार फुलह्याम माथि जित दर्ता गरेको छ।

१-० जित निकाल्ने क्रममा युनाइटेडका लागि कप्तान ब्रुनो फर्नान्डेजले गोल गरेका हुन्। युनाइटेडको खेल भने तारिफ योग्य थिएन।

तुलनात्मक रूपमा कमजोर मानिएको फुलह्याम विरुद्ध पनि युनाइटेडले सोचेजस्तो खेल प्रदर्शन गर्न सकेन। खेलमा दुबै टोलीले धेरै अवसर सृजना गर्न सकेन।

खेलको आठौं मिनेटमा युनाइटेडले स्कट मक्टोमिनेको गोलमा अग्रता लिएको थियो। तर गोल गर्ने क्रममा बल नै नछोएका ह्यारी मग्वायर लाई त्यस मुभलाई असर पारेको भन्दै भिडियो असिस्टेन्ट रेफ्रीले अफसाइड दिएपछि गोल रद्द भएको थियो।

३४औं मिनेटमा ब्रुनोले बक्स बाहिर बाट गरेको प्रहार फुलह्याम गोलरक्षक लेनोले सहजै बचाएका थिए। ५९औं मिनेटमा फुलह्यामका विलियनको प्रहारले पनि गोलको दिशा लिन सकेन। ७१औं मिनेटमा युनाइटेडका फाकुन्डो पेलिष्ट्रीको प्रहार पनि लेनोले सहजै बचाए।

८३औं मिनेटमा ब्रुनोको फ्रि-किकले पनि पोस्टको दिशा लिन सकेन। ८९औं मिनेटमा फुलह्यामका ह्यारी विल्सनको फ्रि-किकको नतिजा पनि त्यही रह्यो।

थपिएको ५ मिनेट समयको पहिलो मिनेटमा ब्रुनोले गोल गर्दै आफ्नो टोलीलाई ३ अंक दिलाए। पेलिष्ट्रीको पासमा ब्रुनोले दुई डिफेन्डरलाई चकित पार्दै बक्सको छेउबाट राम्रो गोल गरेका थिए।

जितसँगै ११ खेलमा ६ जित र ५ हार सहित युनाइटेड १८ अंकका साथ तालिकाको छैठौं स्थानमा उक्लिएको छ। फुलह्याम ११ खेलमा ३ जित, ३ बराबरी र ५ हारका साथ १२ अंक सहित १४औं स्थानमा छ। प्रिमियर लिगमा शनिबार अन्य ६ खेल हुँदै छन्।