एजेन्सी – इंग्लिस फरवार्ड ह्यारी केनको ह्याट्रिक मद्दतमा बायर्न म्युनिखले जर्मन बुन्डेस लिगाको ‘डेर क्लासिकेर’ मा सानदार जित निकालेको छ ।

बायर्नले घरेलु टोली बोरुसिया डर्टमुन्डमाथि ४–० को सानदार जित निकालेको हो । बायर्नको जितमा केनले ह्याट्रिक पूरा गर्दा एक गोल डेअट उपमेकानोले गरे ।

सिग्नल इडुना पार्कमा शनिबार राति भएको एक पक्षीय बनेको खेलको चौथो मिनेटमा नै डेअट उपमेकानोको गोलबाट बायर्नले अग्रता लिन सफल भएको थियो । उनले लिरोए सानेको पासमा गोल गर्न सफल भएका थिए ।

त्यसपछिको तीनै गोल केनको नाममा रह्यो । नवौं मिनेटमा सानेकै पासमा केनले गोल गर्दै बायर्नको अग्रता दोब्बर पारे । ७२औं मिनेटमा केनले व्यक्तिगत दोस्रो तथा टोलीका लागि तेस्रो गोल गर्दै बायर्नलाई सहज जिततर्फ अघि बढाए ।

उनले यसपटक किङ्सले कोमानको पासमा गोल गर्न सफल भएका थिए । त्यसपछि इन्ज्युरी समयको थप गरिएको तेस्रो मिनेटमा केनले एलेक्सान्डर पाब्लोभिकको पासमा ह्याट्रिक पूरा गर्दै बायर्नलाई सानदार जित दिलाए ।

यस सिजन इंग्लिस क्लब टोटेनहम हटस्परबाट बायर्न पुगेका केनको बायर्नमा यो तेस्रो ह्याट्रिक हो । उनले यो सिजन बायर्नबाट १४ खेल खेल्दा १७ गोल गरिसकेका छन् ।

यस जितसँगै बायर्न १० खेलबाट २६ अंक जोडेर दोस्रो स्थानमा यथावत छ । पराजित डर्टमुन्डले दोस्रो स्थानमा उक्लने मौका गुमाउँदा २१ अंक जोडेर चौथो स्थानमा रहेको छ ।