एजेन्सी – स्पेनिस लालिगा अन्तर्गत आइतबार रियल म्याड्रिड गोलरहित बराबरीमा रोकिएको छ । घरेलु मैदान सान्टियागो बर्नाबेउमा भएको खेलमा रियल रायो भालेकानो सँग रोकिएको हो ।

खेलमा रियलकै प्रभुत्व रहेको थियो । रायोले भने पोस्टको दिशामा कुनै प्रहार पनि गर्न सकेन । रायोका गोलरक्षक डिमित्रिएभ्स्की भने उच्च लयमा देखिएका थिए । पाँचौं मिनेटमा रियलका फेडे भालभर्डेको प्रहार रायो गोलरक्षक मित्रिएभ्स्कीले उत्कृष्ट ढंगले बचाए । २६औं मिनेटमा मोड्रिचको क्रसमा जोसेलुको हेडरले पोस्टको दिशा लिन सकेन ।

३६औं मिनेटमा रियलका कामाभिँगाको प्रहार र रिबाउन्डमा जोसेलुको प्रहारमा पनि डिमित्रिएभ्स्की बाधक बने । ३९औं मिनेटमा रियलका भिनिसियस जुनियरको प्रहारमा पनि डिमित्रिएभ्स्कीले उत्कृष्ट बचाउ गरे । ४३ औं मिनेटमा रियलका जुड बेलिङ्घमको प्रहार क्रसबारमा लागेर बाहिरियो ।

५४औं मिनेटमा पुनः भालभर्डेको प्रहार डिमित्रिएभ्स्कीले बचाए । ६६औं मिनेटमा भिनिसियसले गोल गरे असिस्टेन्ट रेफ्रीले अफसाइड दिएपछि गोल मान्य भएन । खेलको अन्तिम समयमा रोड्रिगोको प्रहार पनि डिमित्रिएभ्स्कीले बचाउँदै आफ्नो टोलीका लागि एक अंक सुरक्षित गरे । बराबरी पछि रियलले पुनः पहिलो स्थानमा रहने मौका गुमाएको छ ।

रियल १२ खेलमा ९ जित, २ बराबरी र १ हार सहित २९ अंक छ । जिरोनाको १२ खेलमा १० जित, १ बराबरी र १ हार सहित ३१ अंक छ । तेस्रो स्थानको बार्सिलोनाको १२ खेलमा २७ अंक छ । रायो भालेकाना १८ अंकसहित नवौं स्थानमा छ ।