एजेन्सी – इंग्लिस प्रिमियर लिगमा सोमबार लन्डन डर्बीमा चेल्सीले ९ जनामा सिमित टोटनहम हटस्परलाई ४–१ ले हराएको छ । अराजक, तर घटनात्मक खेलमा चेल्सीका लागि निकोलस ज्याक्सनले ह्याट्रिक र अर्को गोल कोल पाल्मरले गरे ।

खेलमा अग्रता भने टोटनहमले लिएको थियो । देजान कुलुसेवस्कीले खेलको छैठौं मिनेटमा घरेलु टोलीलाई अग्रता दिलाएका थिए । तर त्यसपछि भने खेल चेल्सीको तर्फ ढल्कियो ।

१४औं मिनेटमा टोटनहमका ह्युङ–मिन सनले अग्रता दोब्बर बनाएपनि गोल अफसाइड भएर रद्द भयो । २१औं मिनेटमा चेल्सीका रहिम स्टर्लिङले बराबरी गोल गरे । तर भिडियो असिस्टेन्ट रेफ्रीले गोलमा स्टर्लिङले ह्यान्डबल गरेको भनेर निर्णय दिएपछि गोल मान्य भएन ।

२७औं मिनेटमा पुनः चेल्सीका मोइसेस काइसेडोले बराबरी गोल गरेपनि उनको प्रहारमा ज्याक्सन अफसाइड रहेका कारण गोल मान्य भएन । ३३औं मिनेटमा चेल्सीले पेनाल्टी पायो । टोटनहमका क्रिस्टियन रोमेरोले एन्जो फर्नान्डेज माथि गरेको फाउलका कारण रोमेरोले रेड कार्डको सामना गर्दै मैदान छाड्न परेको थियो । पाल्मरले उक्त पेनाल्टीमा गोल गर्दै खेल बराबरीमा ल्याए ।

३७औं मिनेटमा ज्याक्सनले बललाई पुनः जालि चुमाएका थिए तर उनलाई पास दिएका स्टर्लिङ अफसाइड भएपछि गोल मान्य भएन । पहिलो हाफको अन्तिमतिर १० जनामा सिमित टोटनहमका जेम्स म्याडिसन र मिकी भ्यान डे भेन घाइते हुँदै मैदान बाहिरिए । दोस्रो हाफको सुरुवाती समयमा डेस्टिनी उडोगी दोहोरो पहेँलो कार्डको सामना गर्दे मैदान बाहिरिएपछि टोटनहम ९ जनामा सिमित भएको थियो ।

७५औं मिनेटमा ज्याक्सनले स्टर्लिङको पासमा गोल गर्दै खेलमा चेल्सीलाई अग्रता दिलाए । तर ७९औं मिनेटमा एरिक डायरले बराबरी गोल गरेपनि अफसाइड भएपछि गोल पुनः रद्द भयो । त्यसपछि खेलको अन्तिम तिर ज्याक्सनले दुई गोल थप्दै ह्याट्रिक समेत पूरा गरे । उनले इन्ज्युरीको समयको दोस्रो र सातौं मिनेटमा गोल गर्दै ह्याट्रिक पूरा गर्दै खेललाई ४–१ को स्थितिमा पुराए ।

टोटनहमको यो सिजन लिगमा पहिलो हार हो । ११औं चरणको खेल अगाडि पहिलो स्थानमा रहेको टोटनहम यस चरण सकिँदा दोस्रो स्थानमा रहेको छ । टोटनहमको ११ खेलमा ८ जित, २ बराबरी र १ हार सहीत २६ अंक छ । विजयी चेल्सी भने ११ खेलमा ४ जित, ३ बराबरी र ४ हार सहित १५ अंकका साथ १० औं स्थानमा छ ।