एजेन्सी – युरोपेली च्याम्पियन्स लिग अन्तर्गत आज चार समूह (ए, बि, सि, डि) का चौथो चरणका ८ खेलहरु आज हुँदैछन् । मंगलबार ८ खेल भएका थिए ।

समूह ए अन्तर्गत बायर्न म्युनिख र गालातासारायबीच प्रतिस्पर्धा हुनेछ । सोही समूहमा म्यानचेस्टर युनाइटेड एफसी कोपनहेगनको सामना गर्न डेनमार्क यात्रामा छ । दुबै खेल १ः४५ बजे सुरु हुने छन् । यो समूहमा बायर्न ३ खेलमा ९ अंक सहित शीर्ष स्थानमा रहँदा गालातासाराय ४ अंक सहित दोस्रो छ । युनाइटेड ३ अंक सहित तेस्रो रहँदा कोपनहेगन १ अंक सहित पुछारमा छ ।

यस्तै समूह बि अन्तर्गत आर्सनलले सेभिल्लाको सामना गर्दा पिएसभी आइन्डहोभनले फ्रेन्च क्लब आरसी लेन्स सँग भिड्नेछ । यि दुई खेल पनि राति १ः४५ बजे सुरु हुने छन्। ३ खेलको समाप्तिमा आर्सनल ६ अंक सहित पहिलो स्थानमा छ । यस्तै लेन्स ५ अंक सहित दोस्रो, सेभिल्ला २ अंक सहित तेस्रो र २ अंक नै भएको आइन्डहोभन गोल अन्तरका आधारमा पुछारमा छ ।

समूह सि मा भने नापोली र युनियन बर्लिन ११ः३० बजे भिड्दै छन् । सोही समूहमा रियल म्याड्रिड र ब्रागा राति १ः४५ बजे भिड्ने छन् । यो समूहमा रियल ३ खेलमा सत प्रतिसत नतिजा सहित पहिलो रहँदा २ खेल जितेको नापोली दोस्रो छ । ३ अंक सहित ब्रागा तेस्रो रहँदा बर्लिन बिना कुनै अंक चौथो स्थानमा छ ।

समूह डि मा पनि रियल सोसेइडाड र बेन्फिकाको खेल राति ११ः३० बजे सुरु हुनेछ । आरबी साल्जबर्ग र इन्टर मिलान भने राति १ः४५ बजे भिड्ने छन् । समान ७ अंक भएका सोसेइडाड पहिलो र इन्टर दोस्रो स्थानमा छ । ३ अंक सहित साल्जबर्ग तेस्रो र बिना कुनै अंक बेन्फिका चौथो स्थानमा छ ।