एजेन्सी – युरोपेली दोस्रो श्रेणीको फुटबल प्रतियोगिता युरोपा लिगको समूह चरणको खेलमा इंग्लिस टोली लिभरपुल पराजित भएको छ। समूह इ मा रहेको लिभरपुलले फ्रेन्च क्लब टुलुज सँग ३-२ को हार बेहोरेको हो ।

३६औं मिनेटमा टुलुजले एरन डोन्नमको गोलको मद्दतले अग्रता लिएको थियो । लिभरपुल डिफेन्डर कोस्टास सिमिकासको खुट्टाबाट बल खोसेर डोन्नमले गरेको प्रहार अर्का लिभरपुल डिफेन्डर कवान्साहलाई लागेर पोस्टमा गएको थियो ।

यस्तै थिज्स डालिंगाले ५७औं मिनेटमा अग्रता दोब्बर बनाए । उनले भिन्सेन्ट सिएराको पासमा गोल गर्दै अग्रता दोब्बर बनाएका थिए ।

७५औं मिनेटमा लिभरपुलले जीवनदान पायो। क्रिस्टियन क्यासेरेस जुनियरले आत्मघाती गोल गरेपछि लिभरपुल खेलमा फर्किएको थियो । तर त्यसको एक मिनेट पछि नै टुलुजले आफ्नो दुई गोलको अग्रता कायम गर्यो । यसपटक भने फ्रैंक माग्रीले गोल गर्दै खेललाई ३-१ को स्थितिमा पुर्याए ।

८९औं मिनेटमा एलेक्सिस मकाल्लिस्टरको पासमा डिएगो जोटाले गोल गर्दै अर्को गोल फर्काएर खेलको अन्तिम समय रोमाञ्चक बनाए ।

खेलको अन्तिम तिर जारेल क्वानसाहले गोल गरेर खेल बराबरी गरेका थिए । तर गोल गर्ने क्रममा मकाल्लिस्टरले ह्यान्डबल गरेका कारण गोल रद्द भयो । र लिभरपुलले हार बेहोर्न बाध्य भयो ।

सोही समूहमा लास्कके युनियन सेन्ट जीलोइस माथि ३-० को जित निकालेको छ ।

चौथो चरणको खेल सकिँदा लिभरपुल ९ अंक सहित शीर्ष स्थानमा छ । टुलुज ७ अंकका साथ दोस्रो रहँदा युनियन सेन्ट जिलोइस ४ अंक सहित तेस्रो छ । चौथो स्थानमा रहेको लास्कको ३ अंक छ ।