काठमाडौं (हाम्रो खेलकुद) – नेपाली राष्ट्रिय फुटबल टोलीका डिफेन्डर अनन्त तामाङ चोटका कारण अन्तिम समयमा फिफा विश्वकप २०२६ छनोटको दोस्रो चरणमा यूएईको सामना गर्ने टोलीमा परेनन् ।

अनन्तको अनुपस्थितिमा नेपालको डिफेन्सले निकै कमजोर प्रदर्शन गर्यो । यतिमात्र होइन, नेपालले उनी अनुपस्थित भएपछि टोलीको रणनीति नै परिवर्तन गर्नुपरेको थियो । अनन्त र रोहितलाई ४ खेलाडी सम्मिलित डिफेन्सको मध्य लाइनमा खेलाएको नेपालले अनन्त नभएपछि ५ डिफेन्डर उतार्दै रोहितसँग छिरिङ लामा र लाकेन लिम्बूलाई डिफेन्समा खेलाएको थियो ।

दुबईस्थित अल-मकतूम रंगशालामा अनन्तको स्थानमा छिरिङ लामाले पनि पहिलो रोजाइमा रहेर डेब्यु गरे । विंगब्याकमा सनिश श्रेष्ठ र आशिष चौधरीले निरन्तरता पाए । बेन्चबाट योगेश गुरुङ र अन्जन राईले दोस्रो हाफमा मैदान प्रवेश गर्दै डेब्यु गरे ।

त्यसअघि पहिलो हाफमा अमृत श्रेष्ठले १८ औं मिनेटमा चोट बोकेका लाकेन लिम्बुको स्थान लिएका थिए । २७ मिनेट मैदानमा रहेका अमृतको बिर्स्नालायक प्रदर्शनपछि योगेश उनको स्थानमा हाफ टाइमपछि मैदान छिरेका थिए ।

योगेशले गत सिजन ए डिभिजन लिगमा थ्री स्टार क्लबबाट खेलेका थिए भने छिरिङले जावलाखेलबाट खेलेका थिए । नेपाल पुलिस क्लबका डिफेन्डर अन्जन राईले पनि डेब्युको अवसर पाए । राष्ट्रिय टोलीका लागि पहिलो मिनेट खेलेका अन्जनले ८५ औं मिनेटमा छिरिङको स्थानमा लिएका थिए ।

दोस्रो चरणको पहिलो समूह खेलमा नेपाल बलियो युएईसँग ४–० ले पराजित भएको थियो । घरेलु टोलीका लागि युएईका कीर्तिमानी गोलकर्ता अली माबखुटले दुई गोल गरे भने खलिफा अल हम्मादी र फाबियो लिमाले एक–एक गोल गरे ।

नेपालले समूह एचको दोस्रो खेलमा नोभेम्बर २४ मा काठमाडौंमा यमनसँग खेल्नेछ । दशरथ रंगशालामा खेल बेलुकी ७ बजे सुरु हुनेछ । उक्त खेलमा भने अनन्त खेल्ने सम्भावना रहेको छ । एक साता विश्राम गरेका उनले शनिबारबाट नेपाली टोलीसँग प्रशिक्षण गर्ने सम्भावना छ ।