दिपक बोहोरा, पाँचथर

इलाममा प्रथम इलाम गोल्डकप फुटबल प्रतियोगिता आयोजना हुने भएको छ । रेडहर्स फुटबल क्लब इलामको आयोजनामा माघ ६ देखि १३ गते सम्म ‘इलाम गोल्डकप’ फुटबल प्रतियोगिता हुने भएको छ ।

यस अघि नै पत्रकार सम्मेलन मार्फत फागुन–चैतमा आयोजना गर्ने घोषणा गरिएको ‘माइभ्याली गोल्डकप’ भने केही समयलाई स्थगित गरिएको छ । इलामको ठुलो टुँडिखेलमा हुने इलाम गोल्डकपमा नेपाली क्लब र विदेशी गरि ८ टोलीको सहभागिता रहने सोमबार सदरमुकाममा पत्रकार सम्मेलनमार्फत जानकारी दिइयो ।

प्रतियोगितामा आयोजकसहित ए डिभिजन लिग विजेता चर्च ब्वाइज, एनआरटी, झापा, सुनसरी लगायतको सहभागिता रहनेछ । अन्य टोलीको टुंगो लाग्न बाँकी छ । विजेताले उपाधिसहित ५ लाख र दोस्रो हुने टोलीले ३ लाख रुपैयाँ प्राप्त गर्नेछ । रेडहर्स अध्यक्ष सांगे लामाले ५० लाख रुपैयाँभन्दा माथि खर्च हुने बताएका छन् । प्रतियोगिताको तयारी सुरु भइसकेको पनि उनले जानकारी दिए ।

यसअघि फागुन २४ देखि चैत ३ गते सम्म सोही टुँडिखेलमा माइभ्याली गोल्डकप आयोजनाको घोषणा गरिएको थियो। तर, माइभ्याली फुटबल क्लब र रेडहर्सबीच भएको सहमतिअनुसार माइभ्याली गोल्डकपलाई केही समयका लागि स्थगित गरिएको बताइएको छ ।