काठमाडौं (हाम्रो खेलकुद) – नेपाल सुपर लिगको दोस्रो संस्करण अन्तर्गत दशरथ रंगशालामा जारी खेलमा साविक विजेता काठमाडौं रेजर्स र एफसी चितवनले गोलरहित पहिलो हाफ खेलेका छन् ।

खेल प्रतिस्पर्धात्मक भएपनि कुनै टोलीले स्पष्ट मौका भने सिर्जना गर्न सकेका छैनन् । खेलको सुरुवातमै चितवनका विमल घर्ती मगरको थ्रु पासमा रफिक अमिनु पुग्नु अघि काठमाडौं गोलरक्षक अभिषेक बरालले समाते। अर्को मिनेटमा छिरिङ गुरुङको क्रस पनि अभिषेकले समाते ।

१४ औं मिनेटमा काठमाडौंका तोजीदिनोभको लामो दूरी बाट लिएको प्रहारले पोस्टको दिशा लिन सकेन । २३औं मिनेटमा शोखरुखको प्रहारले पनि चितवन गोलरक्षक विशाल श्रेष्ठलाई कुनै समस्या दिन सकेन ।

२६औं मिनेटमा चितवनका रोशन राना मगरको बायाँ खुट्टाले गरेको प्रहार पोस्टको निकै टाढा बाहिरियो । ३५औं मिनेटमा विशाल श्रेष्ठले क्रस समातेर खेलेको लामो पासमा रोशन राना मगरको चिप अभिषेकले समाते । रोशनले पेनाल्टी क्षेत्र बाहिरबाट दुई डिफेन्डरको बिचमा रहेपनि बाउन्स भइरहेको बललाई पोस्टको दिशा दिन खोजेका थिए ।

३९औं मिनेटमा अफ्रिए अक्वाहको फ्रिकिकमा मार्को इभनोभिचले हेडर सम्पर्क गर्न सकेनन् । ४०औं मिनेटमा विमल घर्ती मगरको प्रहार पोस्टको केही टाढाबाट बाहिरियो । ४५औं मिनेटमा काठमाडौंका एनकेंगुए जुनियरको फ्री-किक पोस्टको माथिबाट बाहिरिन पुग्यो ।

काठमाडौँले पहिलो खेलमा इलाम विरुद्ध जित हासिल हारका चितवनले भने पोखरा सँग पराजय भोगेको थियो ।