एजेन्सी – युरोपेली च्याम्पियन्स लिग अन्तर्गत समूह बी को खेलमा फ्रान्सेली क्लब लेन्समाथि फराकिलो जितका साथ आर्सनल समूह विजेता बनेको छ ।

घरेलु मैदान इमिरेट्स रंगशालामा आर्सनलले लेन्सलाई ६-० ले पराजित गर्यो । आर्सनलले खेलको सुरुवाती २७ मिनेटमै ४-० को अग्रता बनाएको थियो । क्लबका लागि ६ फरक खेलाडीले गोल गरे ।

काइ हाभर्ट्ज, ग्याब्रीएल जेसस, बुकायो साका र ग्याब्रिएल मार्टिनेलीले सुरुवाती समयमा गोल गर्दा मार्टिन ओडेगार्डले पहिलो हाफको इन्ज्युरी समयमा पाँचौ गोल थपे । दोस्रो हाफको ८६ औं मिनेटमा जर्जिन्होले पेनाल्टीमा गोल गर्दै ६-० को जित दिलाए ।

समूहको अर्को खेलमा पिएसभीले सेभिल्लामाथि ३-२ को प्रतिस्पर्धात्मक जित दर्ता गर्यो । सेभिल्लाले २-० को अग्रता लिएपनि लुइस ओकाम्पसलाई रातो कार्डमा गुमाउँदा लय बिग्रन पुग्यो ।

सर्जियो रामोसले २४ औं मिनेटमा र युसुफ एन नेस्रीले ४७ औं मिनेटमा सेभिल्लाकका लागि गोल गरे । ६६ औं मिनेटमा ओकाम्पस बाहिरीएपछि इस्माएल साइबरीले लगत्तै पिएसभीलाई खेलमा फर्काए । ८१ औं मिनेटमा भएको नेमान्जा गुडेल्जको आत्मघाती गोलमा पिएसभी खेलमा फर्कियो ।

पिएसभीले इन्ज्युरी समयको दोस्रो मिनेटमा रिकार्डो पेपीको गोलमा जित पक्का गर्यो । यस जितले पिएसभीको नकआउट चरण यात्रा पक्का भयो । समान अंक भएपनि लेन्ससँग हेड टु हेडमा पिएसभी अघि छ ।

आर्सनलको ५ खेलमा १२ अंक तथा पिएसभीको ५ खेलमा ८ अंक छ । लेन्सको ५ र सेभिल्लाको २ अंक मात्र छ ।