काठमाडौं (हाम्रो खेलकुद) – ओलावाले अफिजले इन्ज्युरी समयमा गोल गर्दा नेपाल सुपर लिग २ अन्तर्गत विहीबार धनगढी फुटबल क्लबले बुटवल लुम्बिनी फुटबल क्लबलाई पराजित गरेको छ ।

दशरथ रंगशालामा सम्पन्न खेलको निर्धारित ९० मिनेटमा दुवै टोलीले गोल गर्ने पर्याप्त अवसर पाएपनि सदुपयोग गर्न सकेका थिएनन् । इन्ज्युरी समयमा ओलावालेले अफसाइड ट्रयाप बिट गर्दै गोलरक्षकको खुट्टा मुनिबाट फिनिस गर्दै १-० को जित पक्का गरे ।

पहिलो हाफमा धनगढीले बुटवललाई दबाबमा राखेपनि दोस्रो हाफमा भने बुटवलले पनि अवसर सिर्जना गरेको थियो । पहिलो हाफमा अहमद हिजाजीको प्रहार पोस्टमा लाग्नु धनगढीका लागि दुर्भाग्य सावित भयो । तर ओलावालेले बेन्चबाट मैदान छिर्दै अन्तिम २५ मिनेटमा पटक पटक गोलरक्षक र डिफेन्सलाई समस्या दिए । र अन्त्यमा गोल गर्दै ३ अंक दिलाए ।

धनगढीको यो लिगमा दोस्रो जित हो । यसअघि वीरगन्जविरुद्ध पनि अहमद हिजाजीले अन्तिम समयमा गोल गर्दै २-१ को जित दिलाएका थिए । धनगढी २ खेलमा ६ अंकसहित शीर्षस्थानमा उक्लँदा बुटवल बिना कुनै अंक पुछारमा छ ।

सुरुवाती २० मिनेटमा आशिष चौधरीले बुटवलको डिफेन्सलाई पटक पटक समस्या दिए । राइट ब्याक सरोज तामाङले सातौं मिनेटमा नै पहेंलो कार्ड खाएपछि आशिषले उनीविरुद्ध दबाब कायम गर्न सहज भएको थियो ।

चार विदेशी खेलाडी मात्र पहिलो रोजाइमा उतारेको धनगढीले सटिक अन्तिम पासका लागि सुरुवातदेखि संघर्ष गर्यो । पछिल्लो खेलका प्लेयर अफ द म्याच कृतिश रत्न छुन्जु नहुँदा मिडफिल्ड र आक्रमणमा समन्वय कमी देखियो ।

बुटवलले कप्तान एरिक विष्टको फ्रिकिकमा गोलरक्षक मोहमद ताहालाई परिक्षण गरेको थियो । एरिकले पहिलो बारमा हानेको फ्रिकिक ताहाले फर्काएपछि रिबाउन्डमा बुटवलका खेलाडी केहि ढिलो भए ।

२५ औं मिनेटमा आशिष र अहमद हिजाजीको सहकार्य गोलमा परिणत हुन सकेन । आशिषले ६ यार्ड बक्स नजिकबाट दिएको अन्तिम लो क्रसमा हिजाजीको प्रहार पोस्टमा लाग्दै बाहिरियो । उनले निकै कठिन एंगलबाट उक्त प्रहार गरेका थिए ।

३१ औं मिनेटमा जिलेस्पीले बायाँ विंगमा उत्कृष्ट मुभ सिर्जना गरे । कमल श्रेष्ठलाई बिट गरेर अघि बढेका उनले दिएको लो क्रसले पेनाल्टी क्षेत्रभित्र सहकर्मी खेलाडी भने भेट्न सकेन । त्यसअघि जिलेस्पीकै हेडर पोस्टभन्दा माथिबाट बाहिरिएको थियो ।

३६ औं मिनेटमा बुटवल र धनगढी दुवैले गोल गर्ने अवसर पाए । दुवैतर्फ धनगढीका अभिषेक गुरुङ नै निर्णायक भूमिकामा थिए । एरिकको कर्नरमा जिलेस्पीको हेडरलाई अभिषेकले गोललाइनबाट क्लियर गरे । उक्त क्लियरेन्सपछि अघि बढेको काउन्टर अट्याकमा अभिषेककै हेडर गोल हुन सकेन । हिजाजीले दायाँ विंगबाट दिएको क्रसमा उनको हेडरमा गोलरक्षक बिट भएपनि थोरै परबाट बाहिरिएको थियो ।

४० औं मिनेटमा बुटवलका स्टेफेन बिनोङको प्रहार गोल हुन सकेन । उनले सरोजको लामो पासलाई पेनाल्टी क्षेत्रभित्र नियन्त्रणमा लिँदै देवेन्द्र तामाङलाई बिट गरेपनि अन्तिम प्रहारमा गोलरक्षक ताहालाई कटाउन सकेनन् ।

५५ औं मिनेटमा रोहन कार्कीले पेनाल्टी क्षेत्र बाहिरबाट गरेको प्रहार पोस्टतर्फ जान सकेन । ६७ औं मिनेटमा धनगढीले पेंलती क्षेत्र भित्रबाट गरेको लगातार दुई प्रहार गोलरक्षकसम्म पुग्न सकेन ।

६८ औं मिनेटमा धनगढीका हिजाजीलाई गोलरक्षक ममडुले पेनाल्टी क्षेत्र बाहिर लडाएपनि रेफ्रीले पेनाल्टी दिएनन् । उक्त मुभका क्रममा सहायक रेफ्रीले अफसाइड नदिएको भन्दै बुटवलको बेन्चले असहमति जनाएको थियो । त्यसक्रममा रेफ्री कविन ब्यन्जनकारले बुटवलका अफिसियल सुगन तन्डुकारलाई रातो कार्ड देखाए ।

७४ औं मिनेटमा ओलावाले आफिजले मैदान छिरेको तेस्रो मिनेटमा गोल गर्ने अवसर पाए । अफसाइड ट्रयाप बिट गरेर उनले डिफेन्डरको दबाबका बीच वन भर्सेस वनमा गरेको प्रहार पोस्टभन्दा थोरैले बाहिरियो ।

इन्ज्युरी समयमा ओलावाले पुन: वन भर्सेस वनको स्थिति सदुपयोग गर्न सकेनन् । यसपटक उनको पेनाल्टी क्षेत्र भित्रको प्रहार गोलरक्षक ममडुले बचाए । तर अर्को आक्रमणमा भने ममडु बिट भए ।

ओलावालेले दायाँ विंगमा हिजाजीको पासमा अफसाइड लाइन उत्कृष्ट ढंगले बिट गरे । त्यसपछि उनले पर्याप्त समय लिँदै अघि बढेका गोलरक्षकलाई बिट गर्न सफल भए ।

लिग अन्तर्गत शुक्रबार वीरगन्ज युनाइटेड फुटबल क्लब र चितवन फुटबल क्लबबीच प्रतिस्पर्धा हुनेछ । खेल साँझ ५:३० बजे सुरु हुनेछ ।