एजेन्सी – न्यूक्यासल युनाइटेडले इंग्लिस प्रिमियर लिगमा म्यानचेस्टर युनाइटेडलाई पराजित गरेको छ । न्यूक्यासलले घरेलु मैदानमा युनाइटेडलाई १–० ले पराजित गरेको हो ।

न्यूक्यासलको जितमा दोस्रो हाफमा एन्थोनी गोर्डनले गरेको गोल नै निर्णायक बन्यो । सेन्ट जेम्स पार्क न्यूक्यासलमा शनिबार राति भएको खेलमा गोर्डनले ५५औं मिनेटमा गोल गर्न सफल भएका थिए ।

खेलमा पनि घरेलु टोली न्यूक्यासलले नै पकड जमाएको थियो । युनाइटेडले केही आक्रमण बुनेपनि न्यूक्यासलको बलियो रक्षापङ्ति तोड्न नसक्दा पराजित हुन पुग्यो ।

११औं मिनेटमा एलेहान्द्रो गर्नाचोको प्रहारलाई न्यूक्यासलका गोलरक्षक पोपले बचाए । १७औं मिनेटमा लेविस मिलेको प्रहारलाई युनाइटेडका गोलरक्षक आन्द्रे ओनानाले डाइभ दिदै बचाए ।

२०औं मिनेटमा एलेक्सान्डर इसाकको प्रहारलाई ह्यारी मगाएरले ब्लक गर्दै युनाइटेडको संकट टारे । ३९औं मिनेटमा काइरन ट्रिपिएरको फ्रिकिक बारमा लाग्दै बाहिरिदा न्यूक्यासल अग्रता लिनबाट चुक्यो ।

५५औं मिनेटमा एन्थोनी गोर्डनले गोल गर्दै न्यूक्यासललाई १–० को अग्रता दिलाए । ७८औं मिनेटमा न्यूक्यासलले पेनाल्टी अपिल गरेपनि रेफ्रीले त्यसलाई आफ्नो ध्यानमा राखेनन् । ८२औं मिनेटमा लुका साको कर्नरमा सर्जियो रिगुइलनको हेडरलाई फावियन स्चरले क्लियर गरिदिदा युनाइटेड बराबरीबाट चुक्यो ।

यस नतिजासँगै म्यानचेस्टर युनाइटेडले सन् १९२२ पछि न्यूक्यासलसँग लगातार तीन खेलमा हार बेहोरेको छ । युनाइटेड यसअघि गत अप्रिलमा भएको प्रिमियर लिगमा २–० ले तथा नोभेम्वरमा भएको इएफएल कपमा ३–० ले पराजित भएको थियो ।

यस जितसँगै न्यूक्यासल १४ खेलबाट २६ अंक जोडेर पाँचौं स्थानमा उक्लिएको छ । पराजित युनाइटेड २४ अंक जोडेर सातौं स्थानमा झरेको छ ।