काठमाडौं (हाम्रो खेलकुद) – नेपाली महिला राष्ट्रिय फुटबल टोलीकी गोलकिपर एन्जिला तुम्बापो सुब्बा र डिफेन्डर गिता राना सेथु फुटबल क्लबबाट भारतीय महिला लिग खेल्न आइतबार त्यसतर्फ प्रस्थान गरेका छन् ।

एन्जिला लगातार दोश्रो वर्ष सेथुबाट खेल्न लागेकी हुन् भने गिता पहिलो पटक आवद्ध भएकी हुन् । उनीहरूले गत महिना नै क्लबसँग सम्झौता गरेका थिए। दुबै एफिएफ फुटबल टोलीका सदस्य हुन् ।

गत सिजन सेथुले सेमिफाइनलसम्म यात्रा तय गर्दा पनि एन्जिला टोलीबाट खेलेकी थिइन् । एन्जिलाले लगातार दोस्रो सिजन सेथुबाट खेल्न पाउँदा खुसी लागेको बताएकी थिइन् । ।

‘लगातार दोस्रो सिजन खेल्न पाउँदा निकै खुसी लागेको छ । आशा छ यसपटक गत सिजन भन्दा राम्रो नतिजा निकाल्न सक्नेछौं,’ उनले भनेकी थिइन् ।

गत सिजन एन्जिला सम्मिलित सेथु सेमिफाइनलमा किकस्टार्ट फुटबल क्लबसँग पराजित भएको थियो । उक्त क्लबमा नेपालकै सरु लिम्बू र कप्तान रेनुका नगरकोटे खेलेका थिए ।

महिला लिगको नयाँ सिजन डिसेम्बर दोस्रो सातादेखि मार्चसम्म चल्नेछ । लिगमा ८ टोली छनोट भएपनि ७ टोलीले मात्र प्रतिस्पर्धा गर्ने बुझिएको छ ।

एन्जिलासँगै नेपालका अन्य खेलाडीले पनि लिग अनुबन्ध हुने सम्भावना छ । गत सिजन ६ नेपाली खेलाडीले लिग खेलेका थिए । एन्जिलासँगै लिग विजेता सावित्रा भण्डारी, सरु लिम्बु, रेनुका नगरकोटे, अनिता बस्नेत र रेखा पौडेलले खेलेका थिए । दीपा शाही लर्ड्स एफएमा अनुबन्धित भएपनि उमेर नपुग्दा खेल्न पाएकी थिइनन् ।