काठमाडौं (हाम्रो खेलकुद) – दोस्रो संस्करणको नेपाल सुपर लिग अन्तर्गत दशरथ रंगशालामा जारी खेलमा एफसी चितवन र बुटवल लुम्बिनी एफसीले गोलरहित पहिलो हाफ खेलेका छन् ।

पहिलो हाफको अवधिभर स्पष्ट मौकाहरु दुवै टोलीले बनाउन सकेका छैनन् । पहिलो हाफको अवधिभर दुवै टोलीले स्पष्ट अवसर सिर्जना गर्न सकेका छैनन् । तुलनात्मक रुपमा आक्रमणको धेरै प्रयास भने चितवनले नै गरेको छ ।

पहिलो मिनेटमै चितवनका उत्सव राईले बक्सको छेउबाट लिएको प्रहारमा गती र दिशा दुवै थिएन । छैठौं मिनेटमा चितवनकै रोशन राना मगरले बक्स बाहिर बाट लिएको प्रहार पोस्टको धेरै टाढाबाट बाहिरियो ।

१५औं मिनेटमा चितवनका टोरिक जेब्रिनको कर्नर बुटवल गोलरक्षक मोहम्मडूले पन्च गरिदिए । १९औं मिनेटमा चितवनकै अफ्रिए अक्वाहको फ्रिकिकले बुटवललाई समस्या दिन सकेन । सोही फ्रि-किक पछिको काउन्टर अट्याकमा स्टेफन बिनोङको प्रहार चितवनका कप्तान तथा गोलरक्षक विशाल श्रेष्ठले सहजै समाते ।

२३औं मिनेटमा विमल घर्ती मगरको प्रहार पनि पोस्ट तर्फ जान सकेन । २८औं मिनेटमा टोरिकको प्रहार बक्समा ब्लक हुन पुग्यो । ३७औं मिनेटमा टोरिक बक्समा लड्दा पेनाल्टीको अपील गरेका थिए तर रेफ्रीले प्रज्वल क्षेत्रीले पेनाल्टी दिएनन् । ४०औं मिनेटमा रफिक अमिनुले बक्स भित्र बाट पोस्टको माथि प्रहार गरे ।

४२औं मिनेटमा विमलले ठूलो मौका खेरा फाले । बक्सको दायाँतर्फ अमिनुले दिएको थ्रु-पासमा मोहम्मडुलाई चिप गर्न खोज्दा विमलको प्रहार पोस्टको माथिबाट बाहिरियो ।

चितवन तीन खेलमा एक जित, एक हार र एक बराबरी सहित चार अंक बटुल्दै पाँचौं स्थानमा छ । बुटवल भने समान तीन खेलमा एक जित र दुई हार सहित तीन अंक जोड्दै छैठौं स्थानमा छ ।