काठमाडौं (हाम्रो खेलकुद)- भारतीय महिला लिग २०२३-२४ को उद्घाटन खेलमा गोकुलम केरला एफसीसँगको सेथु एफसीको गोलरहित बराबरीमा नेपाली राष्ट्रिय टोलीकी एन्जिला तुम्बापो सुब्बाले प्लेयर अफ द म्याचको प्रदर्शन गरेकी छन् ।

सेथुसँग लगातार दोस्रो सिजन भारतीय महिला लिगमा खेलिरहेकी एन्जिलाले आज साविक विजेता विरुद्ध क्लिन सिट राखेकी हुन् । नेपाल राष्ट्रिय टिमकी डिफेन्डर गीता राना पनि यो सिजन सेथुसँगै छिन् । गीताले पनि पूरा ९० मिनेट खेल्दै सेथुको क्लिन सिटमा सहयोग गरिन् ।

यसपटक इन्डियन वुमन्स लिगमा ६ नेपाली खेलाडी खेल्दैछन् । फरवार्ड रश्मीकुमारी घिसिङ र मिडफिल्डर अमृता जैसीले स्पोर्ट्स ओडिसाबाट खेल्नेछन् । मिडफिल्डरद्वय दिपा शाही र प्रिती राईले किकस्टार्ट एफसीबाट खेल्दैछन् ।

प्रितीले गत सिजन नै लिग खेल्ने भनेपनि चोटका कारण सहभागी हुन पाएकी थिइनन् । दिपाले भने उमेर नपुगेका कारण व्यावसयिक सम्झौता गर्न नपाउँदा लर्ड्स एफएबाट खेल्न पाएकी थिइनन् ।

किकस्टार्ट एफसीले भोली शनिबार आफ्नो लिग अभियान सुरु गर्न होप्स एफसी सँग खेल्नेछ। खेल नेपाली समय अनुसार दिउँसो १ः१५ बजे सुरु हुनेछ । स्पोर्ट्स ओडिशाले आइतबार इस्ट बंगाल एफसीसँग खेल्नेछ।