एजेन्सी – इंग्लिस प्रिमियर लिग अन्तर्गत घरेलु मैदान ओल्ड ट्राफोर्डमा भएको खेलमा म्यानचेस्टर युनाईटेडले बर्नमाउथ विरुद्ध ३-० को लज्जास्पद हार बेहोरेको हो ।

शुक्रबार मात्रै युनाइटेडका प्रशिक्षक एरिक टेन हागले प्रिमियर लिगको ‘म्यानेजर अफ द मन्थ’ अवार्ड पाएपछिको खेलमा युनाइटेडले यस्तो हार बेहोरेको हो ।

बुधबार राति चेल्सी विरुद्ध सानदार प्रदर्शन गर्दै २-१ को जित निकालेको युनाइटेड खराब लय छोड्दै राम्रो लयमा आएको आँकलन धेरैले गरेका थिए । तर तीन दिन पछि नै युनाइटेडले यस्तो हार बेहोरेको हो ।

बर्नमाउथले पाँचै मिनेटमा डोमिनिक सोलाङ्किको गोलमा अग्रता लिएको थियो । लुइस कुकको पासमा उनले बक्स भित्रबाट फिनिस गर्दै गोल गरेका थिए ।

६८औं मिनेटमा मार्कस टाभेरनियरको क्रसमा हेडर मार्फत गोल गर्दै फिलिप बिलिङले अग्रता दोब्बर बनाए ।

७३औं मिनेटमा टाभेरनियरकै क्रसमा अर्को हेडर गोल गर्दै मार्कोस सेनेसीले अर्को गोल थपेका थिए ।

खेलको अन्तिम समयमा डाङ्गो क्वाटारले चौथो गोल गरेका थिए तर फाउलका कारण गोल रद्द भएको थियो ।

हार बेहोरेको युनाइटेड १६ खेलमा २७ अंकसहित छैठौं स्थानमा छ । जित हासिल गरेको बर्नमाउथ भने १६ खेलमा १९ अंक सहित १३औं स्थानमा रहेको छ ।

यस्तै सोही समयमा भएका अन्य खेलमा ब्राईटन र बर्नलिले १-१ को बराबरी खेल्दा सेफिल्ड युनाईटेडले ब्रेन्टफर्ड माथि १-० को जित निकाल्यो । यस्तै वल्भस र नटिङ्घम फरेस्टले १-१ को बराबरी खेले ।