एजेन्सी – स्पेनिस ला लिगामा शनिबार रियल म्याड्रिडले बराबरी खेलेको छ । रियल बेटिसको घरेलु मैदान बेनिटो भिल्लामरिनमा भएको खेलमा रियल १-१ को बराबरीमा रोकिएको हो ।

खेलको सुरुवाती समयमा नै राम्रो लयमा रहेका रोड्रिगोले सुरुवाती गोल गरेपनि गोल अफसाइडका कारण रद्द हुन पुग्यो । पहिलो हाफमा त्यसबाहेक रियलले स्पष्ट मौकाहरु भने बनाउन सकेन ।

दोस्रो हाफको सुरुवातमा भने रियलले खेलमा अग्रता लिन सफल भयो । जुड बेलिङ्घमले ब्राहिम डियाजलाई पास दिएर बक्स भित्र रन बनाएकोमा डियाजले उनलाई खेलेको सुन्दर पासलाई नियन्त्रणमा लिएर बेलिङ्घमले खेलमा रियललाई अग्रता दिलाएका थिए ।

६६औं मिनेटमा बेटिसले सानदार गोल गर्दै खेलमा फर्कियो । आइटोर रुइबालले बक्स बाहिरबाट उत्कृष्ट प्रहार गर्दै खेल बराबरीमा ल्याएका थिए ।

९०औं मिनेटमा बेटिस जित हासिल गर्नको नजिक आएर चुक्यो । रियलका पूर्व खेलाडी इस्कोको हेडर प्रयास पोस्टमा लागेर फर्किएपछि बेटिस जितको नजिक आएरपनि जित भने निकाल्न सकेन ।

बराबरी पछि रियल पहिलो स्थानमा यथावत नै छ । रियलको १६ खेलमा ३९ अंक रहेको छ भने एक खेल कम खेलेको जिरोनाको ३८ अंक रहँदा १५ खेल खेलेको बार्सिलोनाको ३४ अंक छ । जिरोना र बार्सिलोना आतबार राति एकअर्का सँग भिड्दै छन् ।