एजेन्सी – जर्मन बुन्डेसलिगामा बायर्न म्युनिखले लज्जास्पद हार बेहोरेको छ । बायर्नले घरेलु टोली फ्रान्कफुर्टसँग ५–१ को लज्जास्पद हार बेहोरेको हो ।

बायर्नलाई लज्जास्पद हार चखाउन फ्रान्कफुर्टका एरिक इविम्वेले दुई तथा ओमर मारमस, ह्युगो लार्सन र अन्सगर नाउफले समान एक गोल गरे । बायर्नका योसुवा किम्मिखले एक गोल फर्काए ।

फ्रान्कफुर्टमा शुक्रबार राति भएको खेलमा घरेलु टोलीले खेलको १२औं मिनेटमा ओमर मारमसको गोलबाट अग्रता लिएको थियो । ३१औं मिनेटमा एरिकले गोल गर्दै फ्रान्कफुर्टको अग्रता दोब्बर पारे ।

३६औं मिनेटमा ह्युगो लार्सनले गोल गरेपछि बायर्न खेलमा ३–० ले पछि पर्यो । ४४औं मिनेटमा योसुवा किम्मिखले गोल गर्दै बायर्नलाई खेलमा फर्काउने संकेत दिए ।

तर, दोस्रो हाफमा पनि बायर्नको आक्रमण झनै फितलो बन्दा बुन्डेसलिगाको यो सिजनमा पहिलो हार बेहोर्न पुग्यो । बायर्नका साने बाहेक अन्यको प्रदर्शन बिर्सनलायक रह्यो ।

अर्काेतर्फ सानदार प्रदर्शन गरिरहेको फ्रान्कफुर्टले दोस्रो हाफमा १० मिनेटको अन्तरमा दुई गोल गर्दै बायर्नलाई लज्जास्पद हार चखाए । ५०औं मिनेटमा एरिकले व्यक्तिगत दोस्रो तथा टोलीका लागि चौथो गोल गर्दा फ्रान्कफुर्ट खेलमा ४–१ ले अघि बढ्यो ।

६०औं मिनेटमा अन्सगरले गोल गर्दै टोलीलाई सानदार जित दिलाए । यस जितले फ्रान्कफुर्टले लगातार चार हारको श्रृंखलालाई पूर्णविराम लगाएको छ ।

यस जितसँगै फ्रान्कफुर्ट १४ खेलबाट २१ अंक जोडेर सातौं स्थानमा उक्लिएको छ । सिजनको पहिलो हार बेहोरेको बायर्न १३ खेलबाट ३२ अंक जोडेर दोस्रो स्थानमा रहँदा शीर्षस्थानमा उक्लने मौका गुमाएको छ ।

बुन्डेसलिगाकै अर्काे खेलमा बोरुसिया डर्टमुन्ड आफ्नै मैदानमा आरबी लाइप्जिगसँग ३–२ ले पराजित भएको छ ।