५ असोज | हाम्रो खेलकुद
नेपाली युवा टोलीलाई एएएफसी यु–१६ च्याम्पियनसिपको अन्तिम चरणमा छनोट गराएर स्वदेश फर्केका प्रशिक्षक उपेन्द्रमान सिंहले छनोटका क्रममा आफु दवावमा रहेको स्वीकारेका छन् ।
छनोट हुन सफल भएर स्वदेश फर्कने क्रममा मंगलबार बिहान विमानस्थलमा बाहिर सिंहले भने,‘ यु–१९ ले भर्खरै नतिजा ल्याएको थियो । त्यसले हामीलाई पनि राम्रो गर्न उत्साहित गरेको थियो । तर सँगसँगै छनोट हुन नसकिएला भन्ने दबाब पनि त्यतिकै थियो । त्यसैले मैले खेलाडीलाई छनोट अघि यसको अर्थ बताइसकेको थिए ।’
व्यक्तिगत रुपमा भन्दा पनि टोलीका कारण आफु चिन्तित रहेको राष्ट्रिय फुटबल टोलीका पूर्व कप्तान सिंहको तर्क थियो । ‘व्यक्तिगत रुपमा भन्दा पनि छनोट हुन नसक्दा खेलाडीको मनोबल घट्न सक्छ भन्ने चिन्ता थियो मलाई,’ उनले भने,‘ यो त भर्खर उनीहरुको खेल जीवनको सुरुआती अवस्था हो । सुरुआती सफलताले अघि बढ्न मद्दत गर्न ।’
काठमाडौंमा दुई बर्षअघि भएको एएफसी यु–१६ च्याम्पियनसिप छनोटबाट पनि नेपाल अन्तिम चरणका लागि छनोट भएको थियो । त्यो समय टोलीको प्रशिक्षक बालगोपाल महर्जन र कप्तान विमल घर्ती मगर थिए । त्यहि नेतृत्वमा रहेको यु–१९ ले भदौ १२ गते एन्फा टेक्निकल सेन्टर च्यासलमा साफ यु–१९ च्याम्पियनसिपको उपाधि जितेको थियो । सिंह र महर्जन समकालिन खेलाडी हुन् । यद्दपी प्रशिक्षणमा महर्जनले बढी सफलता चाखिसकेका छन् भने सिंह त्यहि बाटोमा छन् । सिंहको नेतृत्वमा साफ यु १६ च्याम्पियनसिपमा खासै राम्रो प्रदर्शन गर्न सकेको थिएन । उपेन्द्रमान सिंहले पहिलो पटक कुनै पनि टोलीको मुख्य प्रशिक्षकको जिम्मेवारी यही यु–१६मार्फत सुरु गरेका हुन् । त्यसकारण पनि सिंह माथि दबाब थियो ।
नेपाल उत्कृष्ट उपविजेता बन्दै अर्को बर्ष भारतमा हुने एएफसी यु १६ च्याम्पियनसिपका लागि छनोट भएको थियो । सुरुआती दुई खेलमा जोर्डनलार्य २–१ र कीर्तिस्तानलाई ४–२ ले हराएर बलियो अवस्थामा रहेपनि ओमानसँग ३–१ ले पराजित भएपछि टोलीको समूह विजेता बन्ने सम्भावना टुंगिएको थियो । सोही समूहको अर्को खेलमा कीर्तिस्तानले जार्डनलाई हराएपछि नेपाल समूह ‘बी’ को उपविजेता बन्यो । अन्य समूहको नतिजा अनकुल भएपनि नेपाल उत्कृष्ट उपविजेतामा छनोट हुन सफल भएको थियो ।
