एजेन्सी – शीर्ष दौडमा रहेको लन्डन क्लब आर्सनल इंग्लिस प्रिमियर लिगमा एस्टन भिल्लासँग स्तब्ध बनेको छ ।आर्सनल घरेलु टोली एस्टन भिल्लासँग १–० ले स्तब्ध बनेको हो ।

आर्सनललाई स्तब्ध पार्न एस्टन भिल्लाका जोन म्याक्जिनले पहिलो हाफमा गरेको गोल नै निर्णायक बन्यो । यस हारले आर्सनलले आफ्नो शीर्षतासमेत गुमाएको छ ।

भिल्ला पार्क बर्मिङहममा शुक्रबार राति भएको खेलमा घरेलु टोली भिल्लाले खेलको सातौं मिनेटमा नै म्याक्जिनको गोलबाट अग्रता बनाएको थियो । उनले लियोन बेइलीको पासमा गोल गर्न सफल भएका थिए ।

अन्ततः त्यही गोल नै आर्सनललाई पराजित गर्न पर्याप्त बन्यो । भिल्लाले उक्त गोलको अग्रतालाई कायम राख्दै आर्सनलबाट ३ अंक खोस्न सफल भयो ।

सुरुमै पछि परेको आर्सनलले खेलमा बल पोसेसन राख्दै दवाव कायम गरेपनि भिल्लाका अर्जेन्टिनी गोलरक्षक एमिलियानो मार्टिनेजले सानदार प्रदर्शन गर्दा हार टार्न नसक्दा सिजनको दोस्रो हार बेहोर्न पुग्यो ।

यस जितसँगै भिल्ला १६ खेलबाट ३५ अंक जोडेर तेस्रो स्थानमा यथावत रहँदा शीर्षस्थानको लिभरपुल र दोस्रो स्थानको आर्सनलसँगको अंक दुरी छोट्याएको छ । शीर्षस्थानको लिभरपुलको ३७ अंक तथा पराजित आर्सनल ३६ अंक जोडेर दोस्रो स्थानमा छ ।