काठमाडौं (हाम्रो खेलकुद) – नेपाल सुपर लिग ( एनएसएल) मा सोमबार साँझ काठमाडौं रेजर्स र धनगढी एफसी बीचको खेल हुँदैछ ।

पहिलो संस्करणको फाइनल खेलमा यि दुई टोली बीचको खेल दशरथ रंगशालामा साँझ ६ बजे सुरु हुने छ । त्यतिबेला फाइनलमा काठमाडौंले धनगढीलाई १-० ले हराएको थियो। लिग चरणमा धनगढीले काठमाडौंलाई ३-० ले हराएको थियो।
धनगढी ५ खेलमा ११ अंकका साथ तालिकाको शीर्ष स्थानमा रहँदा काठमाडौं भने समान खेलमा ८ अंकका साथ चौथो स्थानमा छ । आज जित हासिल गर्न सकेमा बराबरी अंक भएतापनि हेड टु हेडका आधारमा काठमाडौं शीर्ष स्थानमा उक्लिने छ । यस्तै धनगढी पनि पहिलो स्थानमा अग्रता बढाउने तरखरमा हुने छ ।

धनगढी अहिलेसम्म अपराजित रहेको छ । काठमाडौं भने बुटवल लुम्बिनी एफसीसँग पराजित भएको थियो ।

धनगढी डिफेन्डर रण्डीप पौडेलको बिना नै मैदान उत्रिनु पर्ने छ । उनी तीन पहेँलो कार्ड खाएका कारण निलम्बनमा परेका हुन् ।

त्रिभुवन विश्वविद्यालयको दीक्षान्त समारोह दशरथ रंगशालामा आजको लागि राखिएको हुनाले हिजो र आजका लागि निर्धारण गरिएका दुई खेल प्रभावित भएका हुन् ।

काठमाडौं र धनगढी हिजो बेलुका ५ बजे खेल्ने निर्धारित गरिएको थियो । यस्तै आजको लागि निर्धारित ललितपुर सिटी एफसी र स्पोर्टिङ्ग इलाम एफसी बीचको खेल मंगलबार दिनको १ बजे हुनेछ ।