काठमाडौं (हाम्रो खेलकुद) – नेपाल सुपर लिग ( एनएसएल) को गत संस्करणको विजेता र उपविजेता टोली काठमाडौं रेजर्स र धनगढी एफसीले दशरथ रंगशालामा सोमबार अंक बाँडेका छन् । खेल १-१ को बराबरीमा सकिएपछि दुबैले समान टोलीले १ अंक प्राप्त गरे ।

काठमाडौँले यस खेलमा लागि दुई परिवर्तन गरेको थियो । राजीव लोप्चन र खमीर गिल्सनको स्थानमा प्रशान्त अवस्थी र हिसुब थपलियाले सुरुवाती ११ मा मौका पाएका थिए । उता धनगढीले भने यस खेलमा निलम्बनमा पारेका रण्डिप पौडेलको स्थानमा आशिष चौधरीलाई सुरुवाती ११ मा राखेको थियो ।

पछिल्लो संस्करणका शीर्ष दुई टोली यसपटक पनि राम्रै लयमा रहेका छन् । दुवै टोलीले खेलको अन्तरालमा धेरै मौकाहरु बनाएपनी खेलमा जित हासिल गर्न भने सकेनन् ।

१५औं मिनेटमा धनगढीले खेलमा अग्रता लिन सफल भयो । फलु डियाग्नेको क्लियर गरेको बल काठमाडौंका आन्द्रेस नियाले किपरलाई पास दिन खिन्दा अहमद हिजाजीले बलमा पुगेर किपर एन्जल श्रेष्ठ माथि चिप गर्दै अग्रता दिलाए ।

अर्को मिनेटमा नै काठमाडौँले बराबरी गर्ने मौका खेरा फाल्यो र धनगढीले राहतको सास फेर्यो । तोजीदिनोभको क्रस देवेन्द्र तामाङले क्लियर गर्न नसकेपछि बल क्रसबारमा लागेर फर्कियो र प्रशान्त अवस्थीको खुट्टामा पुग्यो । उनले सिक्स यार्ड बक्सको छेउ बाट बललाई पोस्टको माथि प्रहार गरे ।

२०औं मिनेटमा काठमाडौँका मार्की हिसुब थपलियाको प्रहार टिकेन्द्र सिंह थापाले बचाए । २३औं मिनेटमा तोजीदिनोभको फ्रिकिक सिधै वालमा लागेर फर्कियो ।३०औं मिनेटमा उनकै बक्स बाहिरबाट लिएको प्रहार डिफ्लेक्ट भएर पोस्ट बाहिर जान पुग्यो ।

पहिलो हाफको अन्तिम समय तिर फलु डियाग्नेको फ्रिकिक वालमा लागेर ओलावालेको खुट्टामा पुगेपछि उनले हिजाजीको लागि खेलेको पासमा हिजाजीको प्रहार एन्जलले बचाउ गरे ।

५३औं मिनेटमा रोहन कार्कीले क्लियर गरेको बल ओलावालेका लागि अवसरको रूपमा सिर्जना भयो । वान अन वान जस्तो देखिएको सो अवसरमा उनलाई नियाले रोक्न सफल भए । त्यसको दुई मिनेट पछि काठमाडौंका शोखरूखको प्रहार टिकेन्द्रले बचाएपछि देवेन्द्रले क्लियर गरे ।

६१औं मिनेटमा आशिष चौधरीको क्रसमा फोडे फोफानाको हेडर एन्जलले बचाए । ६४औं मिनेटमा कमल श्रेष्ठको फ्रिकिकना रिचार्ड अग्यमाङको हेडर पोस्टको दिशा लिन सकेन ।

६६औं मिनेटमा भने काठमाडौँले बराबरी गोल गर्यो । तोजीदिनोभको क्रसमा किंगे ओलिभरले हेडर मार्फत गोल गर्दै खेल बराबरीमा ल्याए ।

६८औं मिनेटमा काठमाडौं अग्रता लिनको धेरै नजिक आइपुग्यो । शोखरूखको पासमा तोजीदिनोभको प्रहारमा चाहेजस्तो सम्पर्क बन्न सकेन ।

७३औं मिनेटमा तोजीदिनोभको राम्रो क्रस टिकेन्द्रले समाते । ८०आई मिनेटमा रामचन्द्र वाजीको थ्रु-पासमा हिजाजीको प्रहार पोस्ट माथिबाट बाहिरियो ।

८६औं मिनेटमा कमलको क्रसमा अभिषेक गुरुङको हेडर पोस्टको निकै नजिकबाट बाहिरियो ।

धनगढी अहिलेसम्म अपराजित रहँदै ६ खेलमा १२ अंक जोड्दै पहिलो स्थानमा छ । काठमाडौं भने ५ खेलमा ९ अंक सहित चौथो स्थानमा यथावत छ ।