काठमाडौं (हाम्रो खेलकुद) – पोखरा थन्डर्स नेपाल सुपर लिग २ को प्लेअफमा स्थान पक्का गर्ने पहिलो टोली बनेको छ ।

दशरथ रंगशालामा मंगलबार बुटवल लुम्बिनी एफसीलाई १-० ले पराजित गर्दै पोखराले प्लेअफमा स्थान पक्का गरेको हो । पोखराको जितमा मोजेस ट्वुमले इन्ज्युरी समयको पहिलो मिनेटमा गरेको गोल नै विजयी गोल सावित भयो ।

यस जितेले पोखरा ७ खेलमा १४ अंकसहित शीर्षस्थानमा उक्लिएको छ । यता बुटवल भने ७ खेलमा ७ अंकसहित सातौं स्थानमा छ । बुटवललाई अब प्लेअफमा पुग्न अन्य खेलको नतिजा पनि भर पर्नुपर्ने अवस्था छ ।

एनएसएलमा लिग तालिकाको शीर्ष २ टोलीले सिधै फाइनलमा छनोट हुने क्वालिफायर खेल खेल्नेछन् । क्वालिफायरमा पराजित हुने टोलीले भने लिगको तेस्रो र चौथो स्थान प्राप्त गर्ने टोलीको विजेतासँग अर्को क्वालिफायर खेल्न पाउनेछ ।

मंगलबारको खेलमा बुटवलका स्टेफन बिनोङले चौथो मिनेटमा गरेको प्रहार बक्स भित्रबाट ब्लक हुन पुग्यो । छैठौं मिनेटमा बुटवल कप्तान एरिक विष्टको फ्रिकिक सिधै पोखरा गोलरक्षक यभ्स प्रिसोको हातमा जान पुग्यो ।

आठौं मिनेटमा जिलेस्पी जंग कार्कीले बक्स बाहिरबाट गरेको भली प्रहार प्रिसोलाई बचाउन असजिलो भएपनि बचाउन सफल भए । २० औं मिनेटमा निराजन धामीको क्रसमा स्टेफेन बिनोङको हेडर क्रसबारभन्दा थोरै माथिबाट गयो ।

२५औं मिनेटमा सुरज जिउ ठकुरीको फ्रिकिकमा फ्रान्कलिन टाल्लाको हेडर पोस्टको केही परबाट बाहिरियो । त्यसको तीन मिनेट पछि पासाङ लामाको क्रसमा बिनोङको हेडर पुनः पोस्ट माथिबाट बाहिरियो ।

३३औं मिनेटमा मोसेस ग्याबाको प्रहार सिधै बुटवल गाेलरक्षक मोहम्मडुमको हातमा गयो । ४४औं मिनेटमा सुरजको कर्नरमा दिनेश राजवंशीको हेडर टाल्लाको प्रहार डिफ्लेक्ट भएर बाहिर जान पुग्यो ।

थपिएको समयमा दिपेश आले मगरको बक्स बाहिरबाट लिएको प्रहार मोहम्मडुको हातमा पुग्यो । त्यसपश्चात स्टेफन अन्नोरको बक्स बाहिरबाट लिएको भली पनि पोस्टको दिशामा जान सकेन ।

४९औं मी एटम एन्जल महर्जनको पासमा। जिलेस्पीको पास सिधै मोहम्मडुको हातमा गयो ।

५५औं मिनेटमा आयुष घलानको कर्नरमा मोहम्मडु लाइन अगाडि आएर बल समात्ने क्रममा नभेटेपछि माेसेसको फ्रि हेडर उनले पोस्टतर्फ प्रहार गर्न सकेनन् ।

६५औं मिनेटमा सन्जीव विष्टले ठूलो मौका खेरा फाले । आयुष घलानको पासमा सिर्जना भएको वान अन वान मौकामा उनको प्रहार मोहम्मडुले लाइन अगाडि आएर बचाए ।

सोही मिनेटमा एन्जलको क्रसमा मोसेसको हेडर पोस्ट तर्फ गएन । अर्को मिनेटमा आशिष लामाको बक्स बाहिरबाट लिएको प्रहारले प्रिसोलाई दुःख दिन सकेन ।

७५औं मिनेटमा एरीकको फ्रिकिक प्रिसोले सहजै समाते । ८६औं मिनेटमा जो आईडुको बक्स बाहिरको शक्तिशाली प्रहार मोहम्मडुले राम्रो बचाउ गरेर पोस्ट माथि फालिदिए ।

इन्ज्युरी समयको पहिलो मिनेटमा भने पोखराले गोल गर्न सफल भयो । आयुष घलानको थ्रु-पासमा माेसेसले गोल गर्दै पोखरालाई जित दिलाउन सफल भए ।

लिग अन्तर्गत बुधबार झापा फुटबल क्लब र धनगढी फुटबल क्लबले खेल्नेछन् । दशरथ रंगशालामा खेल साँझ ५ बजे हुनेछ ।