काठमाडौं (हाम्रो खेलकुद) – नेपाल सुपर लिग २ अन्तर्गत शुक्रबार जारी दोस्रो खेलमा एफसी चितवनले झापा एफसीविरुद्ध पहिलो हाफमा १-० को अग्रता लिएको छ ।

दशरथ रंगशालामा खेलको सुरुवाती समयमा नै चितवनले रफिक अमिनुको गोलमा अग्रता बनाएको हो । बलमा पकड जमाएको चितवनले झापाविरुद्ध थप अवसर पनि सिर्जना गरेको छ । काउन्टर अट्याकमा भर परेको झापाले अन्तिम समयमा खेल बराबर गर्ने अवसर पनि पाएको थियो । तर क्रसबार बाधक बन्दा अन्जन विष्ट लगातार खेलमा गोल गर्न चुके ।

खेलको सातौं मिनेटमा चितवनले खेलमा अग्रता लियो । विमल घर्ती मगरको कर्नरमा युसुफ मुबारकको हेडर पश्चात अमिनुले फार पोस्टमा हेडरसहित बललाई जाली चुमाएका थिए ।

१५औं मिनेटमा विमलकै कर्नरमा विक्रम धिमालको हेडर पोस्टको माथिबाट बाहिरियो । १९औं मिनेटमा झापाका समन्दर ओचिलोभले बक्स बाहिरबाट लिएको प्रहार आकासियो ।

२४औं मिनेटमा विशाल बस्नेतको लामो पासमा अन्जनले जोर्गे सान्चेजका लागि खेलेको पासमा उनले बललाई पोस्ट तर्फ प्रहार गर्न सकेनन् । ४४औं मिनेटमा विमलको पासमा उत्सव राईले खेलेको क्रस कुपिचले खुट्टाले क्लियर गरे ।

झापाको ७ खेलका १० अंक रहेको छ भने आज जितेको खण्डमा दोस्रो स्थानमा उक्लेर प्लेअफमा स्थान पक्का गर्नेछ । प्लेअफ समिकरणबाट बाहिरिसकेको चितवन भने आज जितसहित पुछारबाट उक्लन चाहन्छ ।