पोखरा (हाम्रो खेलकुद)– लक्ष्मी हुन्डाई मनाङ मस्र्याङ्दी क्लबका कप्तान अनिल गुरुङ र मिडफिल्डर सुजल श्रेष्ठलाई आइतबार दोहोरो खुसियाली महंगो परेको छ।

पोखरामा जारी आहा रारा गोल्डकप क्वार्टरफाइनलको जितमा महत्वपूर्ण भूमिका निर्वाह गरेका अनिल र सुजलले रात भने वडा प्रहरी कार्यालय बैदाममा बिताउनु परेको थियो। टोलीको जित र अर्का मिडफिल्डर विशाल राईको जन्म दिन मनाउन मनाङ टोलीका अधिकांश सदस्य लेकसाइडको ओजन क्लब पुगेको थिए।

तर, रातको करिब २ बजे तिर होटल फर्कने बेलामा मुल सडकमा होहल्ला गर्दै हिडेको र अपशब्द बोलेपछि गस्तीमा रहेको प्रहरीसँग टोलीको भेट भएको श्रोतले बतायो । मादक पदार्थ सेवन गर्दै होहल्ला गर्न र अपशब्द प्रयोग नगर्न भनेपछि खेलाडी र प्रहरीबीच केही समय विवाद भएको थियो । विवाद चर्कदै गएपछि प्रहरीले राष्ट्रिय टोलीका समेत कप्तान रहेका अनिल र अर्का सदस्य सुजललाई नियन्त्रणमा लिएको थियो । ‘रमाइलो गरेर फर्कनु भइरहेको रहेछ । प्रहरीले सम्झाउँदा उल्टो विवादमा उत्रेपछि स्थिति साम्य बनाउन उहाँहरुलाई नियन्त्रणमा लिनु परेको हो’ प्रहरी श्रोतले भन्यो, ‘चौकीमा ल्याएपछि उहाँहरुले गल्ति महसुस गर्नुभयो, सोमबार बिहान उहाँहरुको आफ्नो मान्छेलाई जिम्मा लगायौं ।’

बिहान फर्कनले बेला अनिल र सुजलले त्यहाँका प्रहरीसँग फोटो खिचाइ हार्दिकताका साथ विदाइ भएका थिए । आइतबार दिउँसो अनिल र सुजलले २÷२ गोल गरेपछि मनाङले धरान फुटबल क्लबलाई ४–१ ले हराँउदै सेमिफाइनलमा पुगेको थियो । सुजल खेलको म्यान अफ दी म्याच घोषित भएका थिए ।

अनिल पोखरा र सुजल धनकुटाका खेलाडी हुन् ।