एजेन्सी – पोर्चुगिज सुपरस्टार क्रिस्टियानो रोनाल्डोको सम्मिलित अल नासारले साउदी प्रो लिगमा अल इत्तिहादलाई ५ – २ ले हराएको छ ।

१० खेलाडीमा सिमित रहँदै खेल अन्त्य गरेको इत्तिहाद विरुद्ध नासारले पुनरागमन जित निकालेको थियो।
नासारको जितमा रोनाल्डो र साडियो मानेले समान २ रएन्डरसन टालिस्काले १ गोल गरे । करिम बेन्जेमा आबद्ध इत्तिहादका लागि दुबै गोल अब्देर रजाक हम्दल्लाहले गरे।

२ गोलसँगै रोनाल्डो सन् २०२३ को बर्षमा सर्वाधिक गोल गर्ने खेलाडीको शीर्ष स्थानमा छन् । रोनाल्डोको ५३ गोल पुगेको छ ।

बायर्न म्युनिखका ह्यारी केन र पेरिस सेन्ट जर्मेन पिएसजीका किलियन एमबाप्पेको समान ५२ तथा म्यानचेस्टर सिटीका एर्लिङ हालान्डको ५० गोल छ । साउदी प्रोको जारी सिजनमा १९ गोलका साथ रोनाल्डो सर्वाधिक गोलकर्ताको शीर्ष स्थानमा छन् ।

मंगलबार प्रिन्स अब्दुल्लाह अल फैजल स्टेडियममा इत्तिहादले १४ औं मिनेटमा अब्देर रजाकले पहिलो गोल गरेका थिए । १९ औं मिनेटमा रोनाल्डोले पेनाल्टीमार्फत गोल गर्दै खेल बराबरी गरे । ३८ औं मिनेटमा टालिस्काले गोल गरेपछि नासार पहिलो हाफमा २-१ ले अघि बढेको थियो।

अब्देर रजाकले ५१ औं मिनेटमा अर्को गोल गर्दै इत्तिहादलाई खेलमा फर्काए । तर ६६ औं मिनेटमा फाबिन्होले रातो कार्ड पाएपछि इत्तिहाद १० खेलाडीमा सिमित भएको थियो।

६८ औं मिनेटमा पेनाल्टीमा रोनाल्डोले अर्को गोल गरेपछि नासारले पुनः अग्रता लिएको थियो। मानेले ७५ औं मिनेटमा गोल गर्दै अन्तर बढाए । मानेले सकिन ८ मिनेट बाँकी रहँदा अर्को गोल गरे।

दोस्रो स्थानमा रहेको नासरको १८ खेलबाट ४३ अंक पुगेको छ । शीर्ष स्थानको अल हिलाल ५० अंक छ ।  २८ अंकका साथ इत्तिहाद छैटौं स्थानमा छ।