पोखरा, ५ असोज

दशै र तिहार बीचमा पोखरा रंगशालामा कलाकार र पोखरा फुटबल संघ विच एचआईभी एड्सबाट संक्रमितहरुको सहयोगार्थ मैत्रिपुर्ण फुटबल प्रतियोगिता हुने भएको छ । बक्स अफिसले पोखरा रंगशालामा २१ कात्तिक देखि मैत्रीपूर्ण फुटबलका लागि फिल्म कलाकारहरुलाई फुटबल मैदानमा उतार्न लागेको हो । त्यसको स्थानीय संयोजन कास्की जिल्ला फुटबल संघको सहयोगमा फेवा व्यवसायी समूहले गरेको छ।

एचआईभी एड्स संक्रमितहरुको सहयोगार्थ हुने मैत्रीपूर्ण फुटबल प्रतियोगितामा पुराना देखि नया फिल्म कलाकारहरु मैदानमा उत्रिनेछन् । जसमा शिव श्रेष्ठ, भुवन केसी, राजेश हमाल, धिरेन शाक्य, निखिल उप्रेती, सुमन सिंहलगायतको उपस्थिति रहनेछ । कास्की जिल्ला फुटबल संघ र कलाकारहरुबीच हुने सो प्रतियोगिता अवलोकनका लागि ५ सय रुपैयाको टिकट मुल्य निर्धारण गरिएको जनाईएको छ । पत्रकार सम्मेलनमा उपस्थित अभिनेता धिरेन शाक्यले प्रतियोगिता सफल पार्न आफूले सक्दो सहयोग गर्ने प्रतिबद्धता व्यक्त गरे ।

बक्स अफिसका अध्यक्ष आर.के. सुवेदीले आफूहरुले स्वदेश एवं विदेशमा पनि कलाकारहरु उतार्दै आएको बताउदै पोखरामा हुने मैत्रीपूर्ण फुटबलले यहाको खेलकुद पर्यटनमा सघाउ पुग्ने बताए । खेलकुद पत्रकार मञ्च कास्कीका निवर्तमान अध्यक्ष विनोद लामिछानेले प्रतियोगिताको सफलताको शुभकामना दिएका थिए ।