एजेन्सी – उपाधि दावेदार तथा साविक विजेता बायर्न म्युनिख जर्मन बुन्डेसलिगामा स्तब्ध बनेको छ । बायर्न घरेलु मैदानमा वेडर ब्रेमेनसँग १–० ले स्तब्ध बनेको हो ।

बायर्नलाई स्तब्ध पार्न ब्रेमेनका मिचेल वेइसेरले दोस्रो हाफका गरेको गोल नै निर्णायक बन्यो । एलिएन्ज एरिना म्युनिखमा आइतबार राति भएको खेलमा खेलभर नै पाहुना टोलीमाथि बल पोेसेसन राख्दै दवाव बढाएपनि गोल गर्न नसक्दा बायर्नले यो सिजनको बुन्डेसलिगामा दोस्रो हार बेहोर्न पुग्यो ।

खेलको २५औं मिनेटमा ब्रेमेनका जस्टिनले गोल गरेपनि भिएआरमा गोलको मुभमा फउल देखिदा गोलले मान्यता पाएन । ५९औं मिनेटमा मिचेल वेइसेरले गोल गरेपछि बायर्न खेलमा पछि पर्यो ।

एक गोलले पछि परेको बायर्नले लगातार अवसर सिर्जना गरेपनि ब्रेमेनको बलियो रक्षापङ्त तोड्न नसक्दा पराजित हुन पुग्यो । ह्यारी केन, जमल मुसिएला, किङ्सले कोमान, लिरोए सानेसँगै योसुवा किम्मिख, थोमस मुलर एरिक म्याक्सिम चुपो मोटिङ र लियोन गोरेट्जकाले ब्रेमेनको पोस्टमा गतिलो आक्रमण बन्न सकेन ।

यस हारले बायर्नको उपाधि यात्रामा धक्का लाग्दा शीर्षस्थानको बायर लिभरकुसनसँग ७ अंकले पछि परेको छ । यस हारसँगै दोस्रो स्थानमा रहेको बायर्नले शीर्षस्थानको बायर लिभरकुसनसँगको अंक दुरी छोट्याउने मौका गुमाएको छ ।

दोस्रो स्थानमा रहेको बायर्नको १७ खेलबाट ४१ अंक छ । एक खेल बढी खेलेको लिभरकुसनको ४८ अंक छ । ब्रेमेन २० अंक जोडेर १३औं स्थानमा छ ।