काठमाडौं (हाम्रोे खेलकुद)– दुई महिनापछि एएफसी एसियन कप छनोट चरण सुरु भएपछि एक बर्ष नेपाली राष्ट्रिय फुटबल टोली अन्तर्राष्ट्रिय फुटबलमा व्यस्त रहन्छ। त्यो एक बर्षमा नेपालले छनोटका ६ खेल र डिसेम्बरमा बंगलादेशमा आयोजना हुने साफ च्याम्पियनसिपमा पनि भाग लिनेछ । नेपालले एसियन कप छनोटका ६ अन्तर्राष्ट्रिय खेल खेल्नुपर्नेछ । होम एन्ड अवेका आधारमा हुने छनोटका आधा अर्थात् ३ खेल नेपालले घरेलु मैदानमा खेल्ने पाउनेछ ।
तर, नेपालमा अन्तर्राष्ट्रिय स्तरको रंगशाला नहुनु र भएकै एकमात्र दशरथ रंगशाला पनि पूर्न निर्माण भइनसकेका कारण नेपालले घरेलु खेल खेल्न पाउनेमा शंका छ । गत बर्षको विनाशकारी भूकम्पले दशरथ रंगशालामा पनि क्षेति पुर्याएपछि त्यहाँ कुनै अन्र्तराष्ट्रिय प्रतियोगिता आयोजना भएको छैन। दशरथ रंगशालामा खेलाउन नमिल्ने भएपनि अखिल नेपाल फुटबल संघ (एन्फा) ले फिलिपिन्स, ताजकिस्तान र यमनसँगको खेलका लागि शसस्त्र प्रहरीको मुख्यालय हलचोक र सातदोबाटोको एन्फा कम्प्लेक्सको मैदानमा खेलाउने प्रस्ताव एसियाली फुटबल महासंघ (एएफसी) मा प्रस्ताव गरेको छ ।
‘हामीसँग मैदानको विकल्प धेरै छैन ’ एन्फाका प्रमुख कार्यकारी अधिकृत इन्द्रमान तुलाधरले भने, ‘एपिएफ र एन्फा कम्प्लेक्सको मैदानमा खेलाउन प्रस्ताव पठाएका छौं ।’ एएफसीको निरक्षणपछि मात्र नेपालमा खेल हुनु नहुने तय हुनेछ । प्रवक्ता समेत रहेका तुलाधरले भने ‘यदि नेपालमा हुन सक्दैन भने हामीले हाम्रो होम म्याच न्यूट्रल भेन्यूमा हुनुपर्ने भनेका छौं ।’
नेपालले खेल्ने ६ मध्ये पहिलो खेल कहाँ खेल्ने भने तय भएको छ । मार्चको २८ तारिकमा नेपाल र फिलिपिन्सबीचको पहिलो खेल मनिलास्थित रिजाल मेमोरियल फुटबल रंगशालमा हुनेछ। ५ खेल पछि तय हुने बताइएको छ। एएफसीले दुई दिनअघि गरेको समूह विभाजन र खेलतालिका अनुसार नेपालले जुन १३, सेप्टेम्बर ५ र नोभेम्बर १४ मा होममा खेल्नु पर्नेछ।
छनोट खेल:
२८ मार्च – फिलिपिन्सविरुद्ध नेपाल
१३ जुन – नेपालविरुद्ध यमन
५ सेप्टेम्बर – नेपालविरुद्ध ताजकिस्तान
१० अक्टुबर – ताजकिस्तानविरुद्ध नेपाल
१४ नोभेम्बर – नेपालविरुद्ध फिलिपिन्स
२७ मार्च २०१८ – यमनविरुद्ध नेपाल
