एनआरटी मकवानपुर गोल्डकपको क्वाटरफाइनलमा

हेटौंडा (हाम्रो खेलकुद) – इलाम गोल्ड कप जितेर फर्केको एनआरटीले सहिद स्मृति स्थानीय तह मकवानपुर गोल्डकप फुटबल प्रतियोगितामा विजयी सुरुवात गरेको छ ।

हेटौडा–६ स्थित गौरीटार बहुउद्देश्यीय रंगशालामा जारी प्रतियोगितामा अर्को ए डिभिजन टोली हिमालयन शेर्पा क्लबलाई बुधबार ३–० ले हराउँदै एनआरटी क्वार्टरफाइनलमा पुगेको छ । एनआरटीलाई जित दिलाउन सरोज तामाङ, रोहन खड्गी र सुमित श्रेष्ठले समान १ गोल गरे ।

२९ औं मिनेटमा सरोजको गोलबाट एनआरटीले अग्रता लिएको थियो । रोहनले ५६ औं र सुमितले ७५ औं मिनेटमा गोल गरेपछि एनआरटीले सहज जित हासिल गरेको थियो । मकवानपुर जिल्ला फुटबल संघको आयोजना भएको छैटौं मकवानपुर गोल्डकपमा बिहीबार मछिन्द्र फुटबल क्लब र एपिएफ फुटबल क्लबबीच प्रतिस्पर्धा हुनेछ ।

मकवानपुरका स्थानीय तहहरूको मुख्य प्रायोजन रहेको प्रतियोगिताको विजेताले उपाधिसहित १५ लाख र दोस्रो हुने टोलीले १० लाख रुपैयाँ प्राप्त गर्नेछ । प्रतियोगिताको सर्वोत्कृष्ट खेलाडीले बुलेट मोटरसाइकल पाउनेछन् । विधागत उत्कृष्ट खेलाडीले जनही २५ हजार रुपैयाँ प्राप्त गर्नेछन् ।