एजेन्सी – इएफएल कप अन्तर्गत बिहिबार राती भएको सेमीफाइनलको दोश्रो लेगमा म्यानचेस्टर युनाईटेड हल सिटिसंग २-१ले पराजित भएको छ। तर, पहिलो लेगमा २-०को जित दर्ता गरेको युनाईटेड समग्रमा ३-२को जित हासिल गर्दै फाइनल पुगेको हो।

टम हडलस्टोनले पहिलो हाफमा गोल गर्दै घरेलु टोली हल सिटीलाई अग्रता दिलाएका थिए। उनले ३५औं मिनेटमा पेनाल्टिमार्फत गोल गरेका थिए। तर खेलको ६६औं मिनेटमा पल पोग्बाले गोल गरेपछि खेल बराबरीमा आइपुगेको थियो।

खेल सकिन पाँच मिनेच बाँकि रहँदा हल सिटिका लागि नयाँ खेलाडी ओमार नियासेले गोल गरे। थप कुनै गोल नभएपछि युनाईटेड हारका बावजूद पनि फाइनलमा पुग्यो।

युनाईटेडले फाइनलमा साउथह्याम्पटनको सामना गर्नेछ। पहिलो सेमीफाइनलमा लिभरपुललाई पराजित गरेको सेन्ट्सले दुवै लेगमा १-०को जित दर्ता गरेको थियो। फाइनल खेल २६ फेब्रअरीका दिन वेम्बली रंगशालामा खेलिनेछ।