पोखरा (हाम्रो खेलकुद)– लक्ष्मी हुन्डाई मनाङ मस्याङ्दी क्लब आहा रारा गोल्डकप फुटबल प्रतियोगितामा अरु भन्दा फरक इतिहास बनाइसकेको टोली हो । २०५८ मा पहिलो पटक क्याराभान गोल्ड कप र त्यसपछि आहा रारा गोल्डकपको नाममा आयोजित फुटबल प्रतियोगितामा सर्वाधिक फाइनल खेल्ने टोली मनाङ हो ।

आहा रारामा शनिबार मनाङ दसौं पटक फाइनल खेल्दैछ । त्यसपछि सर्वाधिक फाइनल खेल्नेमा नेपाल पुलिस क्लबको नाम आउछ । विभागिय टोलीले ८ पटक फाइनल खेलेको छ । क्याराभान समेत जोड्दा पुलिसले ५ पटक उपाधि जितेको छ भने मनाङ र रुस्लान थ्री स्टारले समान ४ पटक आहा राराको उपाधि जितेका छन् । यी तीन टोलीबाहेक आहा रारा गोल्डकप जित्नेमा आयोजक सहारा र अफ्रिकन युनाइटेड मात्र छन् ।

आहामा अहिले सम्म १० टोलीले मात्र फाइनल खेलेका छन् । मनाङ, पुलिसपछि थ्री स्टारको नम्बर आउँछ । ४ पटक फाइनल खेलको थ्री स्टार चारै पटक च्याम्पियन बनेर फर्केको छ । त्यस्तै अर्को विभागिय टोली आर्मी र शनिबारको खेलपछि सहाराको समान ३ वटा फाइनल खेलेको अनुवभ हुनेछ । त्यसबाहेक एपिएफ, अफ्रिकन युनाइटेड, जावलाखेल युथ क्लब र फ्रेन्ड्स क्लबले एक एक पटक फाइनल खेलेका छन् ।

१५ औं आहा रारा गोल्डकपका आइपुग्दा तीन बर्षअघिको कथा दोहोरिएको छ । फेरी एक पटक मनाङ र आयोजक सहारा फाइनलमा भिड्ने तयारीमा छन् । २०७० मा मनाङलाई १–० ले स्तब्ध पार्दै सहारा पहिलो पटक च्याम्पियन बनेको थियो । त्यसयता सहारा पहिलो पटक फाइनल खेल्दैछ । २०६८ मा पहिलो पटक फाइनल खेल्दा सहारालाई थ्री स्टारले १–० ले हराएको थियो । साविक विजेता समेत रहेको मनाङ उपाधि रक्षा गर्ने अभियानमा हुँदा सहारा मनाङविरुद्धको इतिहासलाई निरन्तरता दिने पक्षमा हुनेछ । मनाङले फाइनल जितेमा अर्को इतिहास रच्ने छ । त्यो अवस्थामा टोलीले पाँचौं पटक उपाधि जित्ने छ । आहा रारा गोल्डकप जित्ने मनाङ पहिलो टोली हुनेछ । पुलिसले क्याराभान र ४ पटक आहा रारा जितेको थियो ।

सहाराले पहिलो खेलबाहेक संघर्षपूर्ण जितका साथ फाइनलको यात्रा तय गरेको थियो । मनाङको पनि सेमिफाइनल कठिन रह्यो । त्यसैले दुवै फाइनलका लागि पनि पक्कै सचेत भएर उत्रनेछन् । फाइनलको एक दिन अघि पोखरा रंगशालामा आयोजित पत्रकार सम्मेलनमा दुवै टोलीका प्रशिक्षक र कप्तानले उपाधि जित्ने विश्वास व्यक्त गरेका छन् ।

मनाङका प्रशिक्षक छिरिङ लोप्साङ गुरुङले राष्ट्रिय टोलीका स्टार खेलाडी रहेकाले पनि त्यसलाई जितको आधारमा मानेका छन् । उनले भने ‘विपक्षी टिम राम्रै छ । हाम्रो अहिले टिम सेट नै बलियो छ । राष्ट्रिय खेलाडी पनि धेरै छ । त्यसैले उपाधि जित्नेमा आशावादी छौं ।’ मनाङका कप्तान अनिल अनील गुरुङले फाइनलका लागि दबाब नरहेको बताए । उनले भने, ‘प्रेसर खासै छैन । फाइनललाई जित्ने गरि खेल्नुपर्छ । त्यो दिन जसले राम्रो खेल्छ उसले जित्छ ।’

सहाराका प्रशिक्षक किरण श्रेष्ठले मनाङ बलियो टोली भएकाले त्यस्तो टोलीविरुद्ध रणनीति पनि त्यहि अनुरुपको बनाउनुपर्ने बताए । उनले भने,‘घरेलु मैदानको फाइदा उठाउन हामीलाई छ । तर मनाङसँग अनुभवी राष्ट्रिय खेलाडी छन् । आशा गरौं फाइनल राम्रो हुनेछ ।’ सहाराका कप्तान उत्तम गुरुङले उपाधि जित्नेमा टोली विश्वस्त रहेको बताए ।

पहिलो चरणमा सुदुरपश्चिमलाई ४–१ ले सहजै हराएको सहाराले क्वार्टरफाइनलमा सिक्किम युनाइटेड र सेमिफाइनलमा आर्मीलाई हराउन टाइब्रेकर सम्म कुर्नु परेको थियो । उता क्वार्टरफाइनलमा धरान फुटबल क्लबमाथि ४–१ जित निकालेको मनाङले सेमिफाइनलमा संकटालाई १–० झिनो अन्तरले हराएको थियो ।

यसपटकको फाइनल यात्रा
सहारा                                                                                              मनाङ
विरुद्ध सुदूरपश्चिमाञ्चल          ४–०              पहिलो चरण                    बाई
विरुद्ध सिक्कि युनाइटेड            ०–० (४–२)   क्वार्टरफाइनल                 विरुद्ध धरान ४–१
विरुद्ध आर्मी                             ० –० (४–३)   सेमिफाइनल                    विरुद्ध संकटा १–०

आहा रारा गोल्डकप फुटबल प्रतियोगिताका विजेता
बर्ष                                    विजेता                 स्कोर                 उपविजेता
२०७३                                   ?                              ?                         ?
२०७२                                  मनाङ                    १–०                     आर्मी
२०७१                                  थ्री स्टार                 १–०                     मनाङ
२०७०                                  सहारा                    १–०                      मनाङ
२०६९                                  थ्री स्टार                 १–०                     सहारा
२०६८                                  मनाङ                    २–०                      जावलाखेल
२०६७                                  थ्री स्टार                १–०                       मनाङ
२०६६                                  पुलिस                   १ –०                     आर्मी
२०६५                                  पुलिस                   ५–०                       आर्मी
२०६४                                  पुलिस                   २–०                        एपिएफ
२०६३                                  थ्री स्टार                १ –१ (४–३)            मनाङ
२०६२                                  अफ्रिकन युनाइटेड २–०                        पुलिस
२०६१                                  मनाङ                    ३–२                        पुलिस
२०६०                                  मनाङ                    ३–१                        पुलिस
२०५९                                  पुलिस                    १–०                        फ्रेन्ड्स
२०५८                                  पुलिस                    २–१                        मनाङ (क्याराभान गोल्ड कप )