हेटौंडा (हाम्रो खेलकुद) – नेपाल एपिएफ फुटबल क्लब छैटौंं बागमती गोल्डकप फुटबल प्रतियोगिताको सेमिफाइनलमा पुगेको छ ।

मकवानपुरको बागमती ८ मा जारी प्रतियोगितामा शुक्रबार ए डिभिजन लिग च्याम्पियन टोली चर्च ब्वाइज युनाइटेडलाई ३–१ ले हराउँदै एपिएफ अन्तिम चारमा पुगेको हो । गत साता मात्र एपिएफले छैटौं स्थानीय तह मकवानपुर गोल्ड कपको उपाधि जितेको थियो ।

चर्च ब्वाइजविरुद्ध अनिष महर्जनले २ र फोडे फोफनाले १ गोल गरेका थिए । चर्च ब्वाइजका लागि विशाल बस्नेतले गोल गरेका थिए । अनिष खेलको म्यान अफ दी म्याच घोषित भए र उनले १० हजार रुपैयाँ प्राप्त गरे ।

एपिएफ प्रतियोगिताको सेमिफाइनलमा प्रवेश गर्ने दोस्रो टोली बनेको छ । यसअघि बिहिबार भएको पहिलो क्वाटरफाइनल खेलमा नवजनजागृती युवा क्लबलाई हराउँदै न्युरोड टिम एनआरटी सेमिफाइनल प्रवेश गरेको थियो । एपिएफले फाइनल प्रवेशका लागि आयोजक बागमती खेलकुद विकास समिति वा त्रिभुवन आर्मी क्लबको सामना गर्नेछ ।

शनिबारको क्वाटरफाइनल जावलाखेल युथ क्बल र मछिन्द्र युथ क्लबबीच प्रतिस्पर्धा हुनेछ । जावलाखेल संस्करणको विजेतासमेत हो । प्रतियोगिताको विजेताले १० लाख र दोस्रो हुने टोलीले ५ लाख रुपैयाँ पाउनेछन् ।