दीपक बोहोरा, पाँचथर

यसै साता सुरु हुने चौथो पाँचथर गोल्डकप फुटबल प्रतियोगिताको खेलतालिका सर्वजनिक भएको छ ।

पाँचथर क्लबको आयोजनामा फागुन १२ गते सुरु हुने प्रतियोगिताको सामाजिक सञ्जालमार्फत खेलतालिका सार्वजनिक गरेको हो । फिदिम माविको निर्माणाधिन खेल मैदानमा हुने प्रतियोगिताको उद्घाटन खेलमा आयोजक पाँचथर क्लब र नमोबुद्ध फुटबल क्लब सप्तरी बीच प्रतिस्पर्धा हुनेछ ।

ए डिभिजन टोली त्रिभुवन आर्मी क्लबसहित ८ टोलीले प्रतियोगितामा भाग लिएका छन् । प्रतियोगिताको विजेता टोलीले ५ लाख ५ हजार, दोस्रोले २ लाख ५५ हजार रुपैयाँ प्राप्त गर्नेछन् ।

प्रतियोगितामा फागुन १३ गते झापा ११ फुटबल क्लब झापा र रेडहर्स फुटबल क्लब इलामबीच प्रतिस्पर्धा हुने छ । फाल्गुन १४ गते बाग्मती युथ क्लब सर्लाहीले पथरी ११ फुटबल क्लब मोरङको सामना गर्नेछ ।

फागुन १५ गते भारतको हिल्स फुटबल एकेडेकी र आर्मीबीच प्रतिस्पर्धा हुनेछ । फागुन १६ र १७ गते सेमिफाइनल तथा फागुन १९ गते फाइनल हुनेछ । हरेक खेलको म्यान अफ दी म्याचले ५ हजार रुपैयाँ पाउनेछन् ।

सर्वोत्कृष्ट खेलाडी र उदीयमान खेलाडीले समान १५ हजार तथा सर्वाधिक गोलकर्ता, उत्कृष्ट गोलकिपर, डिफेन्डर, मिडफिल्डर र प्रशिक्षकले समान १० हजार रुपैयाँ प्राप्त गर्नेछन् ।

प्रतियोगितामा फ्यान अफ दि म्याच हुने दर्शकले र सुटआउट हिरो ( खेलमैदानको बिचबाट गोल गर्ने दर्शक) ले समान २ हजार ५ सय प्राप्त गर्ने छन् । प्रतियोगितामा सहभागी खेलाडी, अफिसियका साथै २ सय जना दर्शकको समेत सामुहिक विमा गरिएको आयोजकले जनाएको छ ।