अर्जुन कार्की,बागलुङ

बागलुङमा दोस्रो अर्ना जेसीज कप फुटबल प्रतियोगिता आईतबार सुरु भएको छ ।

प्रतियोगिताको पहिलो दिन बागलुङ सुधार केन्द्र र जिल्ला फुटबल संघ म्याग्दी विजयी हुँदै क्वाटरफाइनलमा प्रवेश गरेका छन् ।

उद्घाटन खेलमा विदेशी खेलाडी साम्बो ओस्कारको ह्याट्रिक मद्धतमा बागलुङ सुधार केन्द्रले चिल्ड्रेन लाईफ स्पोर्टस् क्लब बागलुङलाई ५–० गोलअन्तरले पराजित गर्यो ।

दुई विदेशी खेलाडी सहित मैदान उत्रिएको बागलुङ सुधार केन्द्रको लागि खेलको अभिषेक राना र बेनम थकालीले समान १ गोल गरेका थिए । बागलुङ सुधार केन्द्रले मंगलबार गुठी युनाइटेडसंग खेल्नेछ ।

अर्को खेलमा जिल्ला फुटबल संघ म्याग्दीले लालदुर्गा फुटबल क्लबलाई ४–२ ले पराजित गरेको छ । म्याग्दीका सनम विकले २ , विपुल कार्की र मनिष श्रेष्ठ समान १ गोल गरे । लाल दुर्गाका अनिश तामाङ र लाक्पा तामाङले गोल गरे।

म्याग्दीले मंगलबार हुने खेलमा साविक विजेता श्रीमेयर गणको सामना गर्ने छ । प्रतियोगिताको दोस्रो दिन सोमबार मुलपानी फुटबल क्लब र रुद्रेपिपल युथ क्लब तथा संकल्प पुर्नस्थापना केन्द्र र आदर्श स्पोर्टस् क्लबबीच प्रतिस्पर्धा हुनेछ ।

चैत २ गतेसम्म संचालन हुने प्रतियोगितामा साविक विजेता धौलागिरी अञ्चलका बागलुङ, पर्वत, म्याग्दी र मुस्ताङका १२ वटा टोलीको सहभागिता छ।

प्रतियोगिताको विजेता १ लाख ५५ हजार ५ सय ५५ र दोस्रो टोलीले ७५ हजार ५ सय ५५ रुपैयाँ प्राप्त गर्नेछ। यस्तै सेमिफाइनल पुग्ने टोलीले १५ हजार रुपैयाँ प्राप्त गर्ने जेसीज बागलुङका अध्यक्ष गणेश महतोले जानकारी दिए । प्रतियोगिताका विधागत उत्कृष्ट खेलाडीलाई‌ पुरस्कृत गरिनेछ।