सुशिल पन्त क्षेत्री ,चितवन
विभागिय टोली एपिएफ भण्डाराविरुद्ध फराकिलो जित निकाल्दै गैंडाकोट एफसी सेन्ट्रल कलेज प्रथम भरतपुर फुटबल च्याम्पियनसिपको सेमिफाइनलमा प्रवेश गरेको छ ।

शनिबार अन्तिम क्वाटरफाइनल खेलमा गैंडाकोटले एपिएफलाई‌ ७-० ले हरायो। गैंडाकोटका लागि ग्लोरीले ह्याट्रिक गरे । राजेश पुन, दीपेश आले, विवश नेपाली र एन्जल महर्जनले समान १ गोल गरे ।

पहिलो मिनेटमा नै एपिएफका गोलकिपर विशाल गुरुङको गल्तीमा ग्लोरीले गोल गर्दै गैंडाकोटलाई अग्रता दिलाए । पाचौं मिनेटमा र १७ औं मिनेटमा गोल गर्दै ग्लोरीले ह्याट्रिक गरे । जारी प्रतियोगितामा यो पहिलो ह्याट्रिक हो । पहिलो हाफको इन्ज्युरी समयमा राजेशले गोल गरेपछि गैंडाकोटले ४-० को अग्रता लियो ।

५८ औं मिनेटमा दीपेशले गैंडाकोटका लागि पाचौं गोल गरे । ६४ औं मिनेटमा विवशले छैटौं गोल गरे । इन्ज्युरी
समयमा एन्जलले गोल गरेपछि गैंडाकोट ७-० ले विजयी भयो । ह्याट्रिक गरेका गैंडाकोटका ग्लोरी म्यान अफ दि म्याच भए ।

यो प्रतियोगिताको सेमिफाइनल समीकरण पूरा भएको छ । चैत ६ गते मंगलबारबाट सेमिफाइनल चरणका खेलहरु सुरु हुनेछ । पहिलो सेमिफाइनल ६ गते सेन्ट्रल कलेज २८ बिगाले घैरुङ एफसीको सामना गर्नेछ । दोस्रो सेमिफाइनल बुधबार आबुखैरहनी गाउँपालिका र गैंडाकोटबीच हुनेछ ।

चितवन ११ फुटबल क्लबको आयोजनामा जारी प्रतियोगिता चैत १० गतेसम्म चल्नेछ । प्रतियोगिताको विजेताले ३ लाख ३ हजार र दोस्रोले १ लाख ५० हजार रुपैयाँ प्राप्त गर्नेछ । भरतपुर भ्रमण वर्ष २०२४ को अवसरमा प्रतियोगिता आयोजना गरिएको हो ।