एजेन्सी – इङ्गलिश प्रिमिएर लिग अन्तर्गत मंगलबार राती हुने खेलमा शिर्षस्थानमा रहेको चेल्सी र विगत केहि खेलमा कमजोर प्रदर्शन गरिरहेको लिभरपुल आमने सामने हुँदैछन।
प्रिमिएर लिगको पछिल्लो तिन खेलमा जित हात पार्न असफल रहेको लिभरपुल गत सातामात्र लिग कप र एफए कप बाट बाहिरिएको थियो। लिभरपुलको कमजोर प्रदर्शनलाइ साडियो मानेको अनुपस्थितिसंग पनि जोडेर हेरिएको छ। अफ्रिकन कपमा सहभागी हुन गाबोन पुगेका माने लिभरपुल फर्किसकेका छन्। जारी सिजनमा ९ गोल गरेर लिभरपुलका उच्च गोलकर्ता रहेका मानेको आगमनले लिभरपुललाई फाइदा हुनेछ।
स्पर्ससंगको हार पछि लगातार दुइ खेल जितेको चेल्सी लिभरपुललाई हराएर शिर्षस्थानमा आफ्नो पकड झन् बलियो बनाउने धुनमा हुनेछ। चेल्सीका लागि सबै खेलाडी फिट छन् र प्रशिक्षक कोन्टेले आफ्नो पहिलो रोजाइको खेलाडी खेलाउने पक्का छ।
यी दुइ टोलीको पछिल्लो भेटमा लिभरपुल २-१ले विजयी भएको थियो। चेल्सीको घरेलु मैदानमा भएको खेलमा डेजान लभ्रण र जोर्डन हेन्डर्सनको पहिलो हाफको गोलले लिभरपुलले जितेको थियो। चेल्सीका लागि डिएगो कोष्टाले गोल गरेका थिए।
खेल नेपाली समयानुसार बुधबार बिहान १:४५ बजे सुरु हुनेछ।
