एजेन्सी – स्पेनिस क्लब रियल म्याड्रिडका मिडफिल्डर जुड बेलिङहमले अन्तिम समयमा गोल गरेपछि अन्तर्राष्ट्रिय मैत्रीपूर्ण खेलमा इंग्ल्यान्ड हारबाट जोगिएको छ ।

घरेलु मैदानमा इंग्ल्यान्डले बेल्जियमसँग २–२ गोलको बराबरी खेलेको हो । एक गोल इभान टोनीले गरे । बेल्जियमका लागि दुवै गोल युरी टिलेमान्सले गरेपनि जितको लागि पर्याप्त भएन ।

वेम्वली स्टेडियम लन्डनमा मंगलबार राति भएको खेलको ११औं मिनेटमा युरी टिलेमान्सले गोल गर्दै बेल्जियमलाई सुरुवाती अग्रता दिलाए । उनले एमाडोउ ओनानाको पासमा गोल गर्न सफल भएका थिए ।

१७औं मिनेटमा इभान टोनीले पेनाल्टीमा गोल गर्दै खेललाई १–१ गोलको बराबरीमा ल्याए । २७औं मिनेटमा जरोड बोवेनले गोल गरेपनि भिएआरमा अफसाइड ठहरिदा गोलले मान्यता पाएन ।

यता, ३६औं मिनेटमा टिलेमान्सले व्यक्तिगत र टोलीका लागि दोस्रो गोल गर्दै बेल्जियमलाई पहिलो हाफमा २–१ को अग्रत दिलाए । उनले रोमेलु लुकाकुको पासलाई सदुपयोग गरे ।

हारतर्फ लम्किरहेको इंग्ल्यान्डलाई २० वर्षीय बेलिङहमले उद्धार गरे । इन्ज्युरी समयको थप गरिएको पाँचौं मिनेटमा बेलिङहमले गोल गर्दै इंग्ल्यान्डलाई हारबाट जोगाए । उनले जेम्स म्याडिसनको पासमा गोल गर्न सफल भएका थिए ।