काठमाडौं (हाम्रो खेलकुद) – विश्वकप छनोटको खेल र त्यसअघि भएको मलेसिया भ्रमणमा अतिरिक्त पदाधिकारी विना स्वीकृति पठाएको विषयमा अखिल नेपाल फुटबल संघ (एन्फा) ले राष्ट्रिय खेलकुद परिषद (राखेप) लाई लिखित जवाफ फर्काएको छ ।

राखेपले स्वीकृति नलिई एन्फाले यसै महिना मलेसियामा १० अतिरिक्त पदाधिकारी तथा बहराइनमा भएको विश्वकप छनोटको खेलका लागि थप ८ पदाधिकारीलाई पठाएको थियो । राखेपले प्रचलित कानुन बमोजिम परिषदबाट स्वीकृति नलिई गएको विषयमा एन्फालाई सचेत पत्र पठाएको थियो । एन्फाले चैत्र २० गते उक्त पत्रको लिखित जवाफ दिँदै उक्त पत्रलाई गम्भीरता पूर्वक ग्रहण गरी महसुस गरेको बताएको छ ।

एन्फाले यससँगै राखेपको पत्र प्राप्त गर्दा टोली अभ्यास खेलका लागि मलेसिया पुगेको र त्यहाँबाट नै बहराइन प्रस्थान गरेको हुँदा स्वीकृति लिन असम्भव भएको बताएको छ । बहराइनमा भएको खेलका लागि थप ८ अफिसियल गएको सम्बन्धमा भने एन्फाले ती पदाधिकारीको खर्च नेपाल सरकार वा संघलाई नपरेर मित्र राष्ट्रहरुबाट नै बेहोरेको जनाएको छ ।

यसबाहेक राखेपले स्वीकृति नदिएपनि एन्फाले युवा तथा खेलकुद मन्त्रालयमा समेत पत्र लेखेको र युवा तथा खेलकुद मन्त्रालयको सचिवालयमा भएको छलफल पश्चात १ जना हटाएर बहराइन पठाउन परिषदमा समन्वय गरेको जानकारी दिएको छ । यसबाहेक एन्फाले ती पदाधिकारी बहराइनमा नेपालको घरेलु खेल रहेकाले आफू आयोजकको रुपमा जिम्मेवारी बहन गर्न गएको समेत लेखेको छ ।

एन्फा महसचिव किरण राईले लेखेको उक्त पत्रमा नेपालको घरेलु खेल प्राविधिक कारणले बहराइनमा खेल्नुपर्ने भएको समेत जनाएको छ । जबकी एन्फाले नै मैदान अन्य प्रायोजनको लागि प्रयोग गर्न स्वीकृति दिँदा खेल मैदानको अवस्था जिर्ण भएका कारण फिफाले खेल्न योग्य नरहेको बताएको थियो ।

यसबाहेक एन्फाले मलेसिया भ्रमण र बहराइनमा भएको खेलका लागि बेग्ला बेग्लै अफिसियल टोली पठाएकोमा पनि एन्फाको आलोचना भएको थियो । एन्फाले उक्त खर्च अन्य राष्ट्रले गरेको बताएसँगै उक्त घटनाले अब नयाँ मोड लिने देखिन्छ । नेपालमा हुने खेल नेपाल बाहिर हुनु र नेपालबाट टोलीमा भूमिका नरहेका अतिरिक्त पदाधिकारीको खर्च अन्य राष्ट्रले उठाएको विषय असामान्य मान्न सकिन्छ ।