काठमाडौं (हाम्रो खेलकुद) – महिला लिग छनोट लिगको शीर्ष टोली कोशी प्रदेश बराबरीमा रोकिएको छ । अघिल्ला ४ खेलमा शत प्रतिशत जित निकालेको कोशीलाई आइतबारको दोस्रो खेलमा मधेश प्रदेशले गोलरहित बराबरीमा रोकेको हो ।

५ खेलपछि ४ जित र १ बराबरका १३ अंकसहित शीर्षस्थानमा यथावत छ । समान खेलमा ७ अंकसहित मधेश चौथो स्थानमा छ ।

कर्णालीको तेस्रो जित

कर्णाली प्रदेशले महिला लिग छनोटमा तेस्रो जित हासिल गरेको छ । घरेलु मैदानमा कर्णालीले लुम्बिनी प्रदेशलाई ४–१ ले हराएको हो ।

सुर्खेतस्थित कर्णाली प्रदेश रंगशालामा आइतबार बिहान भएको खेलमा घरेलु टोलीलाई जित दिलाउन सुनकला राईले २, वर्षा ओली र सन्जिता बम्जोङले समान १ गोल गरे । लुम्बिनकी कप्तान ममता पुनले गोल फर्काइन् ।

१८ औं मिनेटमा सुनकलाले पहिलो र ३७ औं मिनेटमा गोल गर्दा कर्णालीले पहिलो हाफमा २–० को अग्रता बनायो । लुम्बिनीकी ममताले ६७ औं मिनेटमा गोल गर्दै अन्तर घटाइन् । सन्जिताले ७५ औं मिनेटमा गोल गर्दै कर्णालीलाई पुनः अग्रता दिलाइन् ।

खेल सकिन ६ मिनेट बाँकी रहँदा वर्षाले गोल गर्दै कर्णालीको जितअन्तरलाई बढाइन्। चौथो खेलमा तेस्रो जितपछि ९ अंकसहित तेस्रो स्थानमा पुगेको छ । लुम्बिनी ३ अंकसहित पाँचौं स्थानमा छ । सहभागी ७ प्रदेशको लिग पछि शीर्ष ३ टोली अन्तिम चरणका लागि छनोट हुनेछन्।